د کندهار – هرات پر لویه لار نن سهار (وږي ۱۷ مه) د کندهار ژړۍ ولسوالۍ کې د يوه بس او لارۍ ترمنځ د ټکر په پېښه کې ۱۵ مسافر وژل شوي او ۲۵ تنه نور ټپیان شوي.
په وژل شویو کسانو ک۳ ښځې او ۳ ماشومان شامل دي.
دغه راز په ۲۵ ټپي شوو مسافرو کې هم ښځې او ماشومان شامل دي.
پېښه نن سهار وختي شپږ بجې د کندهار د ژړۍ ولسوالۍ د حوض مدد په سیمه کې رامنځ ته شوې.
د پېښي قربانیان د پوليسو او اردو له لوري د میرویس حوزوي روغتون ته انتقال شوي.
د کندهار د والي ویاند عزیزاحمد عزیز امریکاغږ اشنا رادیو ته وويل چې پېښه کې ټول د ۴۰۴ مسافر وړونکي بس سپرلۍ ته مرګ ژوبله اوښتې.
دی زیاته وي چې په حوض مدد سیمه کې د مازدا لارۍ او ۴۰۴ مسافر وړونکي بس ترمنځ ټکر د بې اختیاطۍ له کبله رامنځ ته شوې.
ښاغلي عزیز وویل "سهار شپږ بجې د ټکر په دې پېښه کې ټول ۴۰ کسانو ته مرګ ژوبله اوښتې چې ۱۵ وژل شوي او ۲۵ نور ټپیان دي چې ټپیانو کې هم ۳ مېرمني او یو ماشوم او په وژل شویو کې ۳ مېرمني او ۳ ماشومان شامل دي".
مسافر وړونکی بس له کندهار څخه د هرات ولایت ته مسافر لیږدول.
د کندهار د عامي روغتیا ریس ډاکتر عبدالقیوم پخلا امریکاغږ اشنا رادیو ته وويل چې د ۴ تنو ټپیانو روغتیايي حالت نازک دی.
تېره اونۍ په کندهار کې د ترافیکي پېښو د مخ نیوي لپاره ترافیک پوليسو یو لړ نوي اقدامات تر سره کړه چې له مخکې يې د مسافر وړونکو موټرو د ګړندي تګ مخه نیول ښودل شوي وو.
د کندهار ترافیک پوليس وايې چې د لویو لارو پر سر يې د مسافر وړونکو موټرو د سرعت د کنټرول په برخه کې پام زیات کړی او پدې اړه يې ۴ بسان تېره ورځ جریمه کړي هم دي.
