د افغانستان د ملي مصالحې د عالي شورا رئیس عبدالله عبدالله، د سیمې هیوادونو ته د سفرونو په لړ کې د افغانستان د سولې بهیر ته د ملاتړ د جلبولو لپاره ایران ته لاړ.
د مصالحې عالي شورا د یکشنبې په ورځ اکتوبر ۱۸ (تلې ۲۷) په یوه خبرپاڼه کې لیکلي چې د ښاغلي عبدالله دغه سفر د تهران د رسمي مقاماتو په بلنه شوی دی.
ښاغلي عبدالله د ایران د بهرنیو چارو د وزیر محمد جواد ظریف او د ایران د اسلامي شورا د مجلس له رئیس محمد باقر قالیباف، سره له کتنو وروسته په خپل رسمي فیسبوک کې لیکلي چې ایراني مقاماتو د افغانستان د سولې له هڅو ملاتړ کړی دی.
عبدالله عبدالله، ویلي دي چې د ایران د اسلامي شورا د مجلس رئیس په افغانستان کې سوله د سیمې د امنیت او سولې په ګټه ګڼلې او ویلي یې دي، ایران د هغه سولې نه چې د افغانستان "خپلواکي او د خاورې بشپړتیا" وساتي ملاتړ او پلوي کوي.
د ایران د بهرنیو چارو وزیر هم ښاغلي عبدالله ته ویلي دي چې ایران په افغانستان او سیمه کې د سولې او ددې بهیر نه د اجماع د ترلاسه کولو د هڅو ملاتړ کوي.
عبدالله عبدالله د افغان سولې بهیر څخه د سیمې د ملاتړ او سیمه ییزې اجماع پیاوړي کېدو په هدف روانه میاشت لومړی پاکستان او وروسته هند ته سفرونه وکړل.
ښاغلي عبدالله تر دې مخکې د افغان سولې بهیر څخه د سیمې هیوادونو ملاتړ مهم بللی و.
