عبدالله عبدالله، د افغانستان د حکومت اجرائیه رئیس، ویلي دي چې د سولې د مشورتي لویې جرگې په اړه ورسره مشوره نده شوې او په همدې دلیل پدې جرگه کې گډون نه کوي.
ښاغلي عبدالله دا خبره د امریکا غږ اشنا تلویزیون سره په یوه ځانگړې مرکه کې کړې ده.
عبدالله عبدالله، له طالبانو سره د سولې خبرې په اړه هم ویلي دي که طالبان له دې فرصت څخه گټه وانخلي، نو د جگړې د دوام مسؤلیت به هم د هغوی په غاړه وي.
د حکومت اجرائیه رئیس دا هم زیاته کړې چې د قطر په پلازمېنه دوحه کې د افغانانو ترمنځ په "ډیالوگ" کې هم گډون نه کوي.
عبدالله عبدالله د مؤقت حکومت د جوړېدو سره مخالفت ښودلی او ویلي دي چې هېڅکله یې د یو مؤقت حکومت وړاندیز ندې کړی.
