د پاکستان صدراعظم عمران خان په داسې حال کې د پنجشنبې په ورځ قطر ته سفر کړی، چې ټاکل شوې د شنبې په ورځ د فبروري په ۲۹مه امریکا او طالبان د دغه هېواد په پلازمینې دوحه کې د سولې توافق لاسلیک کړي.
د پاکستان د بهرنیو چارو وزیر شاه محمود قُریشي ویلي، چې عمران خان به په دې سفر کې د قطر له امیر شیخ تمیم ابن حماد الثاني سره پر دوه اړخیزو اړیکو او د سیمې پر وضعیت خبرې وکړي.
د هغه پر وینا د افغانستان د سولې په بهیر کې د پاکستان مسولیت پای ته رسېدلی او هېواد یې "دغه ناممکن کار ممکن کړی دی".
د پاکستان د بهرنیو چارو وزیر زیاته کړې ده چې عمران خان به په دې سفر کې د قطر له امیر سره د افغانستان د سولې بهیر په اړه هم خبرې وکړي.
خو ښاغلي قریشي ویلي، چې صدراعظم خان به د امریکا او طالبانو ترمنځ د سولې موافقې د لاسلیکولو په مراسمو کې ګډون ونکړي.
نوموړي د افغانستان د جمهوري ریاست انتخاباتو په اړه له تبصرې کولو ډډه کړې، خو ویلي یې دي چې د انتخاباتو مسله باید د سولې د بهیر خنډ نشي.
