د عفو نړیوال سازمان د میانمر پوځي قواوې پدې تورنوي چې د هغو مسلمانانو پر لارې چې غواړي په راخین ولایت کې د تاوتریخوالو نه وتښتي، ماینونه ایښي دي.
دغه سازمان د عیني شاهدانو او څیړونکو سره د مرکو پر بنسټ وایي چې د راخین د ولایت په شمالي پولې باندې چې د مسلمانو روهینگیایانو د تېښتې لاره ده، د “هدفي ماینونو” څخه کار اخیستل شوی دی.
د عفوې د نړیوال سازمان یوه مقام، تیرانا حسن اسوشیتد پرس ته وویل چې “ ټولې نښې نښانی ددې څرگندونه کوي چې د میانمر پوځي ځواکونو په لوي لاس د روهینگیایي مسلمانانو پر لارې دا ماینونه خښ کړي دي. دا له ظلمه ډک سلوک د هغو بې وزلو خلکو د لا کړاو سبب گرځي چې د سیستماتیک ازار او اذیت نه په تېښته کې دي.”
د بشري حقونو دغه اداره خبر ورکوي چې پر دې لارې باندې د همدغو ماینونو د چاودنې په نتیجه کې څو هغه روهینگیایان ټپي شوي دي چې غوښتل یې له دې لارې ځانونه بنگله دیش ته ورسوي.
تر اوسه پورې د میانمر څخه درې سوه زره کسان یا روهینگیایي مسلمانان، چې په میانمر کی اقلیت گڼل کیږي، بنگله دیش ته کډه شوې دي.
نړیوالې ټولنې د نولسوه اوه نویم نه را پدېخوا د نړیوالو معیارونو پر بنسټ، د ماینونو ایښودل منع کړل.
د میانمر د جمهوري ریاست ویاند په دې اړه عکس العمل ونه ښود او د پوځ ویاند یې هم عذر وکړ چې د لوړ پوړو پوځي چارواکو د اجازې نه پرته نشي کولای پدې اړه څه ووایي.
د میانمر په راخین نومي ولایت کې تاوتریخوالي د اگست د پنځه ویشتمې نیټې نه وروسته هغه مهال پیل شو چې د هغه هیواد د چارواکو په وینا روهینگیایي مسلمانانو د پولیسو او حکومتي ځواکونو پر پوستو باندې برید وکړ.
د همدې بریدونو په ځواب کې د میانمر پوځ د بلواگرو د جرړو د ایستلو دپاره د پاکسازۍ عملیات پیل کړل.
فراري روهینگیاییان چې په بنگله دیش کې یې شمیر درې سوه زرو کسانو ته رسیږي وایي چې د میانمر پوځي ځواکونو په راخین کې ملکي وگړي هم په نښه کړل او کلیو ته یې اور واچاوه.
