د سولې په چارو کې د افغانستان د دولت وزارت وايي چې د بل هر وخت په پرتله د سولې د خبرو د پیل لپاره زمینه مساعده شوې ده.
د دغه وزارت ویاندې ناجیې انوري د سه شنبې په ورځ سپتمبر۱ (وږي ۱۱) امریکا غږ ته وویل چې افغان حکومت له طالبانو سره د سولې د خبرو پیل لپاره ټول خنډونه او پلمې له مخې پورته کړې دي.
اغلې انوري زیاته کړه: "د سولې په چارو کې د دولت وزارت د افغانستان د اسلامي جمهوري د مرکچي پلاوي د استولو لپاره د همغږۍ او لوژیستیکي اقداماتو په ترسره کولو کې بوخت دی."
ځینو رسنیو راپور ورکړی چې ښايي د افغان حکومت مرکچي پلاوی سبا دوحې ته سفر وکړي، خو د دغه پلاوي یوه غړي محمد ناطقي امریکا غږ ته وویل چې تراوسه په دې تړاو وروستۍ پریکړه نه ده شوې.
په ورته وخت کې د افغانستان د مصالحې د عالي شورا ویاند فریدون خوځون په خپل ټویټر کې لیکلي: "د اسیرانو د تبادلې بحث پیل شوی دی او ښه پرمخ ځي. د دې بهیر له بشپړېدو وروسته، د مذاکراتو د پیل لپاره به زمینه برابره شي."
تیره ورځ د امریکا د متحده ایالاتو د ملي امنیت سلاکار رابرټ اوبراین د افغانستان له جمهور رئیس محمد اشرف غني سره په ټیلفوني خبرو کې د بینالافغاني مذاکراتو پر ژر پیلېدو ټینګار وکړ.
د جمهوري ریاست ویاند صدیق صدیقي وویل چې په دغو خبرو کې د تلپاتې سولې لپاره د اوربند پر اهمیت هم ټینګار شوی دی.
د افغانستان د دولت او وسلهوالو طالبانو ترمنځ د سولې مذاکرات د بندیانو د خوشې کولو په پروسې کې د خنډونو له امله تراوسه نه دي پیل شوي.
د امریکا-طالبانو ترمنځ د سولې د تړون په اساس تراوسه افغان حکومت د ۵۰۰۰ طالب بندیانو له شمېرې ۴۶۸۰ طالب بندیان خوشې کړي او ټاکل شوې چې ۳۲۰ نور هم خوشې کړي.
همداشان افغان حکومت له طالبانو څخه غوښتي چې د افغان ځواکونو کومانډویان چې د دغې ډلې په بند کې دي خوشې کړي.
