په کابل کې روغتیايي مسئولین وايي چې له دغه ښار څخه یې په نشو د اخته کسانو د ټولولو او په روغتونو کې د درملنې بهیر ګړندی کړی.
د معتادینو د درملنې د ابن سینا زر بستریز روغتون مشر ډاکټر احمد ظاهر سلطاني وايي چې په نوي ۱۴۰۰ کال کې به د کابل ښار پر واټونو او لارو د معتادینو شمېر تر ډېره راکم کړي.
هغه وايي " موږ په خپل روغتون کې د زر کسانو د درملنې ظرفیت لرو، چې په ۴۵ ورځې کې یې درملنه کېږي، د معتادینو د تعویضي درملنې لړۍ چې موږ پیل کړې ده ښه نتیجه یې ورکړې چې دا به نورو ولایتونو ته هم وغځیږي".
د کابل په بېلا بېلو سیمو، لارو کوڅو کې په سلګونو معتادین دېره دي، چې د دغه ښار د اوسېدونکو ستونزې یې زیاتې کړې دي.
کابل ښاریان له حکومت څخه غواړي چې د معتادینو د درملنې غم دې وخوري، که نه په نشو د اخته کسانو شمېر به تر دې هم زیات شي.