د غزني اوسېدونکی رحیم الله څلور کاله وړاندې هغه مهال په نشو اخته شو چې مېرمن یې ناڅاپه د یوې ناروغۍ له امله مړه شوه.
هغه چې درې بچیان لري وايي له ګڼو ستونزو سره مخ شو او اوس چې کور ته ځي مېرمن یې ور یادیږي او خپه کیږي.
رحیم الله وايي " ملګرو سره ناست وم هغوی ویل دا ډېر ښه شی دی ویې کاروه چې فکر دې پرې بدل شي ما هم وکارول او پرې اخته شوم. نور په داسې بد وضعیت کې وم چې زړه مې غوښتل موټر ته ځان واچوم او ځان ووژنم له ژونده تنګ راغلی وم".
رحیم الله وايي اوس یې پتیلې چې روغتون ته لاړ شي او د تل لپاره له نشو لاس واخلي او بېرته له خپلو بچیانو سره د خوښۍ یو ګډ ژوند پیل کړي.