د افغان چارواکو په وينا د ډنډپټان لاره وروسته له هغه پاکستاني پوځيانو تړلې، چې څو ورځې مخکې د همدې ولسوالۍ په سرحدي سيمه انځرکي کې ځينې نظامي تاسيسات يې افغان ځواکونو ته وسپارل.
د افغان حکومت په وينا دا نظامي تاسيسات د پاکستاني پوځيانو له لوري د ډيورنډ کرښې دې غاړې ته جوړ شوي وو، خو د طالبانو پرضد له عملياتو وروسته دا سيمه افغان حکومت په ولکه کې واخيستله.
د پکتيا د سوداګرۍ د خونو رئيس عبدالنصير عالميار امريکاغږ ته وويل، چې د ډنډپټان لارې په تړل کېدو سره د کرښې دواړو غاړو ته لسګونه لارۍ موټرې چې په سوداګريزو مالونو بار دي، د لارې د خلاصېدو په تمه ولاړې دي.
د سوداګرۍ د خونو رئيس ښاغلي عالميار همدارنګه وويل، چې د دې لارې د خلاصېدو په اړه د دواړو غاړو د سوداګرو او چارواکو ترمنځ خبرې شوې، خو ظاهراً تر اوسه کومې نتيجې ته نه دي رسيدلي.
د ډنډپټان لاره يوه غير رسمي ترانزيټي لاره ده، چې د تورخم او سپين بولدک لارو په څېرې پرې سوداګريز مالونه انتقالېږي. د پکتيا، لوګر، غزني او د ځينو نورو ولايتونو يو شمېر سوداګر له دې لارې واردات او صادرات لري.
پاکستاني مقاماتو د يادې شوې لارې د تړلو په اړه تر اوسه څه نه دي ويلي، خو د پکتيا د ولايتي شورا غړی حفيظ الله مبارز د دواړو هېوادونو له حکومتونو غوښتنه لري چې سوداګري غيرسياسي کړي.
پاکستان د پکتيا د ډنډپټان لاره داسې مهال د سوداګرو پرمخ تړي، چې په دې وروستيو کې د ډيورنډ کرښې په اوږدو کې يو ځل بيا د دواړو هېوادونو د امنيتي ځواکونو ترمنځ د تشدد ځينې پېښې شوې.
د څېړونکو په وينا د پاکستان له لوري د ترانزيټي لارو بيا بیا تړل د دې لامل شوي، چې په دې وروستيو کلونو کې له هغه هېواد سره سوداګريزه راکړه ورکړه په بې سارې ډول کمه شوې ده.
