یوې نوې طبي څېړنې ښودلې ده ښځې چې څومره ډېر سکس (جنسي مقاربت) وکړي، هماغومره یې عمر اوږدېږي او صحت به یې هم ښه وي.
دغه تازه څېړنه د سایکو سکشول په ژورنال کې خپره شوې ده. څېړنه وايي د ۲۰ او ۵۹ کلونو ترمنځ عمر لرونکي ښځې چې کم سکس کوي–په یوې اوونۍ کې تر یو ځل هم کم– د بېلا بېلو عواملو له کبله ۷۰ سلنه د مرګ له خطر سره ډېرې مخامخې دي.
د امریکا د مینسوتا ایالت د والډن پوهنتون څېړونکي د ۱۴۵۴۲ ښځو، چې تر ۲۰ کلونو یې عمرونه زیات وو، د روغتیایي معلوماتو له ارزونې وروسته دې نتیجې ته ورسېدل، چې په یوې اوونۍ کې تر یو ځل ډېر سکس کول ښځو ته ډېرې روغتیايي ګټې لري.
د دغې څېړنې لیکونکو لیکلي: «جنسي اړیکي د زړه او رګونو د سلامتیا لپاره مهم دي، البته د زړه د درزېدو د تغیر د کموالي او وینې د بهیر د تېزوالي له کبله.»
څېړونکو موندلې ده چې کله سکس کم وشي او ژور خپګان ورسره یو ځای شي، د مرګ خطر پېښوي.
د دغې نوې څېړنې سر محققې سریکانتا بنرجي د ډیلي میل ورځپاڼې ته ویلي، که یو کس او په خاص ډول یوه ښځه له ژور خپګان څخه کړېږي، خو په جنسي مقاربت (سکس) کې فعاله وي، د ژور خپګان له کبله د نورو په پرتله کمه ځورېږي.
ژور خپګان د نورو روغتیایي ستونزو د پیدا کېدو تر څنګ د مړینې لامل هم کېدای شي. ډاکټره بنرجي وایي چې د سکس په وخت کې په بدن کې تولید کېدونکي اندورفینونه د ژور خپګان د منفي صحي اغیزو د مخنیوي اساسي عنصر دی.
اندورفینونه هغه کیمیاوي مواد دي، چې د سکس، بدني تمرین، خوږې غذا د خوړلو او دا ډول نورو خوښۍ بخښونکو فعالیتونو له کبله په بدن کې تولید کېږي. دا مواد درد تسکین کوي، فشار کموي او د بدن د حس ځواک غښتلی کوي.