تر شدیدو جګړو وروسته نن سهار وختي افغان قواووي د پنجوايي ولسوالۍ له مرکز څخه پر شا شوي.
امنیتي منابع وايې چې د پنجوايي ولسوالۍ او کندهار ښار ترمنځ امنیتي کمربند د ښار ۷ حوزې ته را رسیدلی.
پنجوايي د کندهار په جنوب کې د ښار له ۷ حوزې سره په سرحد کې پرته ولسوالي ده.
یاده ولسوالي له تیري یوې اونۍ راهیسې د وسله والو طالبانو له لوري کلابنده وه چې نن سهار يې سقوط وکړ.
د کندهار امنیتي مقامات د پنجوايي ولسوالۍ د سقوط په اړه تبصره نه کوي.
خو د کندهار یو لوړپوړي امنیتي مقام د نوم نه ښودلو په شرط نن یکشنبه جولای څلورمه (چنګاښ ۱۳) امریکا غږ ته وويل چې تیره شپه له کندهار ښار څخه تازه دمه سرتیري د پنجوايي ولسوالۍ مرکز ته رسیدلي او هلته محاصره سرتیري يې کندهار ښار ته انتقال کړي.
سرچینې وويل: "په تیره یوه اونۍ کې تر ۳۰ زیات امنیتي سرتیري په پنجوايي ولسوالۍ کې له وسله والو طالبانو سره په جګړه کې وژل شوي د ولسوالۍ مرکز هم سخت محاصره و، خو د تازه دمه سرتیرو په مرسته د ولسوالۍ له مرکز څخه ټول سرتیري کندهار ښار ته رسیدلي او اوس د ولسوالۍ ټول تاسیسات د وسله والو طالبانو تر ولکې لاندې دي."
د پنجوايي ولسوالۍ سقوط ته په غبرګون کې د کندهار ښار اوسیدونکې د دې ښار د امنیت په اړه تر بل هر وخت زیات اندېښمن کړي او باور لري چي د پنجوايي ولسوالي سقوط پر کندهار ښار ستر اغېز لري.
د کندهار ولایتي شورا هم د پنجوايي ولسوالۍ په څېر د مهمو سیمو سقوط ته تُند غبرګون ښودلي او د کندهار د امنیت لپاره يې د مرکزي حکومت د ځانګړي پاملرنې غوښتنه کړې.
د کندهار د ولایتي شورا رئیس حاجي سیدجان خاکریزوال امریکا غږ ته وويل چې: "د کندهار د ولسوالیو امنیت د اندېښنې وړ دی د مهمو سیمو له لاسه وتل ښه حالت ندی مرکزي حکومت باید ژر تر ژره د کندهار د امنیت په برخه کې اقدام وکړي."
دغه راز په ژړۍ ولسوالۍ کې هم چي د پنجوايي په ګاونډ کې پرته ده د شدیدو جګړو راپورونه تر لاسه شوي.
بلي خواته امنیتي منابع وايې چې ولسمشر غني د کندهار د امنیت په اړه له ولایتي مقاماتو سره غږیدلی او په امنیتي برخو کې يې د ځينو بدلونونو تر څنګ د دې ولایت د امنیت ډاډ ور کړی.
وسله والو طالبانو رسنیو ته په لیږلي یوه بیان کې ادعا کړې چې د پنجوايي ولسوالي يې په بشپړه توګه تر خپلي ولکې لاندي را وستې.