په افغانستان کې د ملګرو ملتونو د سیاسي استازولۍ (یوناما) مرستیالې د بشري حقونو د یو شمېر ښځینه فعالانو سره لیدنه کې ویلي چې بشري حقونه باید په دغه هېواد کې تر پښو لاندې نشي.
د افغانستان لپاره د ملګرو ملتونو د استازولۍ مرستیالې مټه نوډسن همدارنګه ویلي: "طالبان مسؤلیت لري ترڅو دا ډاډ رامنځته کړي چې په افغانستان کې بشري حقونه د ټولو لپاره په برابر ډول تضمینيږي."
د هدا خموش په نوم یوې ښځینه فعالې چې په دغه لیدنه کې ګډون کړی، ویلي چې دوی د ښځو، رسنیو او د بیان د ازادۍ په وړاندې د محدودیتونو او د «طالب سرتیرو لخوا د پخوانیو افغان سرتیرو د وژلو» په اړه اندېښنې شریکې کړې.
طالبانو پر افغانستان تر حاکمیت وروسته ویلي چې د افغان مېرمنو حقوق به د اسلامي شریعت په چوکاټ کې تامین کړي او هم یې د پخواني افغان حکومت مامورینو ته «عفوه» اعلان کړې، خو فعالانې اندېښنه لري چې د ښځو حقوق یې تر پښو لاندې نشي.
پر همدې مهال د طالبانو د ویاند مرستیال انعام الله سمنګاني نن سه شنبه جنورۍ څلورمه (مرغومې ۱۴) رسنیو ته په لېږلې پیغام کې ویلي چې دوی ښځو او نارینو ته د تعلیم او کار زمینې برابرواو ته ژمن دي.
نوموړي زیاته کړې: "د افغانستان اسلامي امارت هیڅ ډول ممنوعیت نلري، البته هڅه کوي چې د ښځو لپاره ښه کاري محیط برابر شي."
د طالبانو حکومت د سپټمبر میاشتې پر ۱۷مه د هلکانو ښوونځي پرانیستل، خو له شپږم ټولګي پورته د نجونو ښوونځي نه پرانیستل.
په افغانستان کې د طالبانو حکومت ویلي چې دوی د مناسب چاپېریال په رامنځته کولو سره د نجونو تعلیم ته ژمن دي.
د طالبانو ویاند ذبیح الله مجاهد په دې وروستیو کې وویل چې په نوي کال کې به ټول ښوونځي او تعلیمي مرکزونه د نجونو پر مخ پرانیستل شي.
د طالبانو په تیر حکومت کې مېرمنو ته د کار کولو اجازه نه ورکول کېدل او هغوی باید له کور څخه د وتلو لپاره حجاب کړی وای.
دا په داسې حال کېده چې تر دې مخکې هم ملګرو ملتونو په افغانستان کې د بشري حقونو په اړه اندېښنې ښودلې وې او د دغه سازمان مسؤلینو ویلي و د دې لپاره چې په دغه هیواد کې د تیرو دوو لسیزو لاسته راوړنې خوندي شي، باید په دغه هیواد کې بشري حقونه، د افغانستان د ټولو وګړو عزت او په ځانګړي ډول د ښځو او نجونو د کار او تعلیم حق خوندي شي.