د اسلام پیغمبر ته د منسوب کارتون په اړه د فرانسې د ولسمشر امانویل مکرون د څرګندونو په غبرګون کې د ترکیې ولسمشر رجب طیب اردغان له خپلو خلکو غوښتي چې د فرانسې تولیدات ونه پیري.
ښاغلي اردغان په انقره کې د دوشنبې په ورځ اکتوبر ۲۶ (تله ۵) دا غوښتنه کړې ده. هغه د شنبې په ورځ ویلي وو چې امانویل مکرون باید «رواني ډاکټر» ته ولاړ شي.
فرانسې له دغو څرګندونو وروسته له ترکیې څخه خپل سفیر ور وغوښت.
د فرانسې ولسمشر د تاریخ د يو ښوونکي له وژلو وروسته اسلامپالان غندلي وو او د اسلام پیغمبر ته د منسوب کارتون د خپرېدو ننګه یې کړې وه.
تېره اونۍ په فرانسه کې د تاریخ یو ښوونکی له هغه وروسته ووژل شو چې په ټولګي کې یې د اسلام پیغمبر ته منسوب یو کارتون د بیان ازادۍ په بحث کې وښوده.
د پاکستان د بهرنیو چارو وزارت د ښاغلي مکرون د څرګندونو په اړه په اسلام اباد کې د فرانسې سفیر وربللی دی. د پاکستان صدراعظم د فیسبوک په شبکې غږ کړی دی چې د اسلام ضد پاروونکي مسایل بند کړي.
په همدې حال کې په قطر، اردن او کویټ کې په یو شمېر مارکیټونو کې د فرانسې محصولات لېرې شوي دي او په یو شمېر نورو هېوادونو کې هم غوښتنه شوې چې د فرانسې تولیدات وانخیستل شي.
په سوریه او لیبیا کې بیا خلکو د ښاغلي مکرون په ضد مظاهرې کړې او د هغه تصویرونه یې سوځولي دي.
فرانسوي چارواکو ویلي دي چې دا خوځښتونه د «افراطیانو» له لوري پيل شوي دي.
د فرانسې ولمسشر خپل یو تازه ټویټ کې لیکلي دي چې له خپل دریځ څخه به په شا نشي، د مذهبونو ټولو تفاوتونو ته په سوله ییز ډول درناوی لري او د انساني کرامت او ارزښتونو ننګه به کوي.
ښاغلي مکرون څه موده مخکې ویلي وو چې په فرانسه کې اسلام باید د سعودي، قطر، ترکیه او نور بهرني نفوذ څخه ووځي.