د ارزګان ولایت سیمه ایز چارواکي وايي، ددغه ولایت د چنارتو ولسوالۍ په اړوندو امنیتي پوستو د طالبانو د ډله ایز برید په پایله کې لس پولیس وژل شوي او یو بل لادرکه شوی دی.
د ارزګان ولایت د چنارتو ولسوال فیضمحمد حنفي امریکا غږ ته وویل، دا شمیر پولیس نن سهار وختي څلور بجې هغه مهال ووژل شول، چې تیر ماښام طالبانو د دې ولسوالۍ په چرمستان سیمه کې د پولیسو پر امنیتي پوستو ډله ایز بریدونه وکړل.
د هغه پر وینا په دې برید کې د زینالله په نوم د پولیسو یو قوماندان هم وژل شوی او یو پولیس لادرکه شوی دی.
د چنارتو ولسوال زیاته کړه، ښايي لادرکه شوی پولیس د خپلو همکارانو په وژنه کې له طالبانو سره مرسته کړې وي.
له بلې خوا په ارزګان کې یوې امنیتي سرچینې د نوم نه ښودلو په شرط امریکا غږ ته وویل، طالبانو د دې پوستې وسلې او یو موټر هم له ځان سره وړي دي.
د چنارتو ولسوال فیضمحمد وايي، لا هم د چرمستان په یو شمیر امنیتي پوستو کې د ښکیلو غاړو ترمنځ جګړه روانه ده.
د ارزګان د امنیت آمر رحیمالله خان امریکا غږ ته وویل، د لسو پولیسو د وژنې په اړه یې تحقیقات پیل کړي دي.
د ارزګان د امنیت آمر مني چې په دغه ولایت کې د پولیسو خپل منځي بریدونه زیات شؤی او دوی یې اندېښمن کړي دي.
هغه زیاته کړه، چې د امنیتي ځواکونو د خپل منځي بریدونو د مخنیوي لپاره یې هڅې پیل کړې دي.
شاوخوا یوه اونۍ مخکې هم د کندهار په خاکریز ولسوالۍ کې دوو پولیسو خپل څلور ملګري وژلي وو.
په دې اړه مو د افغانستان د کورنیو چارو نظر هم وپوښته. د دغه وزارت د ویاند مرستیال امریکا غږ ته وویل، چې تر اوسه د دې پېښې په تړاو هغوی ته دقیق راپور او جزئیات نه دي رسیدلي.
تر اوسه د افغان حکومت کومې مخالفې ډلې په دې هکله رسنیو ته څه نه دي
ویلي.