په داسې حال کې چې لا هم د نجونو په مخ متوسطه او عالي لېسې او پوهنتونونه بند دي، طالب مقامات وايي چې د کندهار او هلمند په ولایتونو کې یې ۶۲۰ درسي ټولګي تر «امر ثاني» پورې تړلي دي.
په کندهار کې د طالبانو حکومت د پوهنې ریاست ویاند متوکل احمد نن دوشنبه اپریل ۱۷ (وري۲۸) امریکا غږ ته وویل چې دوی دا پرېکړه د خلکو د شکایتونو په اساس کړې ده.
دغه ویاند په دې اړه ډېر معلومات ورنکړل چې خلکو د څه شي په اړه شکایتونه کړي وو، خو ویې ویل چې دا مهال د طالبانو د پوهنې وزارت د مقاماتو او بهرنیو نړیوالو ادارو د استازو ترمنځ په دې اړه خبرې روانې دي.
په همدې حال کې په ټولنیزو رسنیو کې د طالبانو د پوهنې وزارت ته په یو منسوب خپور شوي مکتوب کې ویل شوي دي چې «په کندهار او هلمند کې یې د ټولو تعلیمي موسسو د فعالیتونو او پروژو» د اروزنې لپاره یو پلاوی ټاکلی دی.
دغه وزارت د دغو ارزونې تر ختم پورې یې په کندهار او هلمند کې د ټولو تعلیمي موسسو فعالیتونه ځنډولي دي.
په کندهار کې د طالبانو د پوهنې ریاست ویاند هیله وښوده چې دا ستونزه به ژر حل او ماشومان به بېرته خپلو زده کړو ته ولاړ شي.
دا مطلب هم ولولئ
یو افغان ماشوم چې په پور په ښوونځي کې زده کړې کوينوموړي ونه ویل چې د دغو ټولګیو په تړل کېدو سره څومره ماشومان له زده کړو پاتې دي، خو ویل کېږي چې د دغو ماشومانو شمېر زرګونو ته رسېږي. د ملګرو ملتونو د ماشومانو وجهي صندوق (یونیسف) په ټول افغانستان کې دا ډول اکثریت سیمه ایز ټولګي او پروګرامونه مخې ته وړي.
یونیسف څه موده مخکې افغان ماشومانو ته د زده کړو د دا ډول پروګرام او ټولګیو د پراخولو خبر ورکړی و او ویلي وو چې په ۲۰۲۳ کال کې به ۶۰۰۰ ماشومانو ته د تعلیم زمینه برابره کړي. د یونیسف په وینا دا افغان ماشومان به په ۲۰زره ټولګیو کې درسونه وايي.
تېرکال طالب واکمنانو د یونیسف د مقاماتو په حواله ویلي وو چې دا اداره په ټول افغانستان کې ۹۰۰۰ درسي ټولګي لري او ټاکل شوې چې د ۲۰۲۲ تر پای پورې به ۵۰۰۰ نور ټولګي هم پرانیزي.
د یونیسف د عامه اړیکو مسول سام مورت څه موده مخکې ویلي وو چې دوی د دغه پروګرام له لارې ۱۴۰زره هلکانو او نجونو ته، په داسې یو هېواد کې چې ۳.۷ میلیون ماشومان یې له زده کړو محروم دي، د تعلیم زمینه برابروي.
طالبانو واک ته له رسېدو وروسته د نجونو متوسطه او عالي لېسې وتړلې او د ۲۰۲۲ د ډسمبر په میاشت کې یې د نجونو په مخ د پوهنتونونو دروازې هم تر «امر ثاني» پورې وتړلې.
سره له دې چې طالب واکمانو په وار وار ویلي دي چې د نجونو په مخ به د تعلیم دروازې پرانیزي، خو د طالبانو له بیا واکمن کېدو شاوخوا ۲۰ میاشتې ووتلې، ملګر لا هم نجونو ته د زده کړو اجازه نشته.