د ننګرهار د ولایت مرکز جلال اباد ښار ته څیرمه د مقام خان په سیمه کې د یکشنبې د غرمې وروسته د جنازې په مراسمو کې یو ځانمرګی برید شوی، چې له امله یې اتلس تنه وژل شوي او دیارلس نور ټپیان شوي دي.
د ننګرهار ولایت د والي ویاند عطا الله خوږیاڼي امریکا غږ ته وویل "د یکشنبې په ورځ پاو باندې دوه بجې یو ځانمرګي بریدګرد بهسودو د ولسوالۍ د مقام خان په سیمه کې د جنازې په مراسمو ځان پورې تړلو چاودیدونکو توکو ته چاودنه ورکړې چې له امله یې اتلس تنه وژل شوي او دیارلس نور ټپیان شوي دي."
ښاغلي خوږیاڼي وویل چې برید د ننګرهار ولایت د هسکې مینې ولسوالۍ د پخواني ولسوال حاجي ګل ولي د جنازې په مراسمو کې شوی دی.
Your browser doesn’t support HTML5
د چاودنې د ځاې ویډیو
خو د ننګرهار د عامې روغتیا د ریاست ویاند انعام الله میاخیل امریکا غږ وویل، چې د برید له ځایه دولس مړي او څلوارلس ټپیان په جلال اباد ښار کې د عامې روغتیا ریاست روغتون وروړل شوي دي.
په سیمه کې د امریکا غږ خبریال ذبیح الله غازي چې د برید له ځایه یې لیدنه کړې وايي، د پیښې یو ساعت وروسته هم د برید په ځای کې په وینو لړلې لونګۍ، څپلۍ ،بوټان او جای نمازونه لا هم پراته وو.
تراوسه کومې ډلې د دې برید مسولیت نه دی اخیستی.