د سلواکیا چارواکو د چهارشنبې په ورځ مۍ ۱۵ (غوايي ۲۶) وویل چې ددغه هېواد پر صدراعظم رابرټ فیکو باندې مرګانی برید شوی او روغتیايي وضعیت یې د اندېښنې وړ دی.
د سواکیا په مرکزي ښارګوټي هنډلوا کې پر فیکو باندې له ډزو کېدو وروسته نوموړی روغتون ته لیږدول شوی دی.
پولیسو د ډزو په شک د یو تن د نیولو خبر ورکړی دی.
د سلواکیا حکومت په ټولنیزو شبکو کې په خپره کړې اعلامیه کې ویلي: "نن په هنډلوا کې له حکومتي غونډې وروسته، د سلواکیا د صدراعظم رابرټ فیکو د وژلو هڅه شوې."
فیکو څلور دورې د سلواکیا صدراعظم پاتې شوی او ګوند یې یو ځل بیا په سپتمبر کې عمومي ټاکنې وګټلې.
په حکومتي اعلامیه کې ویل شوي: "هغه شدید ټپي شوی او د عاجلې درملنې دپاره د هلیکوپتر په واسطه د بانسکا بیټریکا روغتون ته ځکه لیږدول کیږي چې براټیسلاوا ته لیږدول یې ډیر وخت نیسي."
د سلواکیا پر صدراعظم له ډزو وروسته نوموړی په هلیکوپتر کې روغتون ته لیږدول شوی.
د فیکو د فیسبوک په رسمي پاڼه لیکل شوي چې پر هغه باندې څو ډزه شوي دي.
په هنډلوا کې د روغتون چارواکو ویلي چې د هغه درملنه روانه ده او ټاکل شوې چې د وضعیت په اړه یې نور معلومات وروسته خپاره شي.
د بریتانیا، چک، پولنډ او یو شمېر نورو هېوادونو مشرانو د پېښې په اړه اندېښنه او د فیکو د روغتیا هیله څرګنده کړې ده.
په اکتوبر کې د صدراعظم په توګه د ټاکل کېدو وروسته، د فیکو ځینو څرګندونو له ګاونډي اوکراین سره د سلواکیا اړیکې خړې پړې کړي دي.
فیکو په ځانګړي ډول د اوکراین د خپلواکۍ په اړه پوښتنې راپورته کړي او ویلي یې دي چې له روسیې سره باید جوړ جاړی وشي.
د فیکو له ټاکل کېدو سره، سلواکیا اوکراین ته د وسلو لیږل بند کړل. هغه د ټاکنیزو مبارزو پر مهال ژمنه کړې وه چې کیف ته به "یوه مرمۍ" هم ورنکړي.
د رسنیو په قانون کې د بدلون په شمول د فیکو ځینو تغیراتو په سلواکیا کې لاریونونه پارولي وو.
پر نوموړي له ډزو وروسته، د فیکو د ګوند لخوا د پارلمان غړي لوبوس بلاها د فیکو منتقدین وغندل. بلاها وویل: "تاسو، لیبرالې رسنۍ او سیاستوال ملامت یاست. رابرټ فیکو ستاسو د نفرت له امله د مرګ او ژوند ترمنځ واقع شوی دی."