د سعودي عربستان ولیعهد محمد بن سلمان، سبا د شنبې په ورځ (سپتمبر ٢٩) کویټ ته سفر کوي او د هغه هیواد د امیر په گډون له چارواکو سره گوري.
د عرب خلیج یو مقام د رویترز اژانس ته ویلي چې د سعودي عربستان او قطر ترمنځ په لانجه کې د کویټي مقاماتو منځگړیتوب د کویټي چارواکو سره د محمد بن سلمان د خبرو عمده موضوع ده.
د کویټ خبري اژانس رپوټ ورکړی چې ټاکل شوې ښاغلی سلکان د کویټ له امیر صباح الاحمد الجابر الصباح سره هم وگوري.
سعودي عربستان، عربي متحده امارات، بحرین او مصر د قطر حکومت د ترهگرۍ نه په ملاتړ او د عربي هیوادونو د سیمه ییز سیال ایران سره په همکارۍ تورنوي او پر دوڅه باندې یې اقتصادي او دپلوماتیک بندیزونه لگولي دي. خو قطر ددغو څلورو هیوادونو ادعاوی رد کړې دي.
کویټ د سعودي عربستان په گډون د څلورو عربي هیوادونو او د قطر ترمنځ په کړکیچ کې میانځگړیتوب کړی و خو هڅې یې ددې جنجال د حل لپاره تر اوسه ناکامې شوې دي.
سعودي عربستان، عربي متحده اماراتو، بحرین او مصر د ٢٠١٧ کال د جون په پنځمه نیټه د قطر سره خپل دیپلوماتیک روابط وشلول او هغه هیواد یې د هوا او سمندر له لارې محاصره کړ.
دغو هیوادونو چې قطر د ترهگرۍ نه په ملاتړ تورنوي او ١٣ غوښتنې یې د هغه هیواد حکومت ته سپارلي دي چې تر اوسه ندي منل شوي.
پدغو غوښتنو کې د ایران سره د اړیکو د کچې راټیټول، د سپاه پاسداران اړوند کسانو ایستل، د الجزیره تلویزوني شبکې تړل، په قطر کې د ترکیې د پوځي اډې بندول او د حماس او اخوان المسلمین ډلو نه ملاتړ نه کول شامل دي.
دوحه دغه غوښتنې "غیر واقعي" گڼلي خو ویلي یې دي چې تیار دی د خبرو له لارې ددغو څلورو عربي هیوادونو سره خپل اختلافات حل کړي.
سعودي عربستان او قطر په سیمه کې د امریکا د متحده ایالاتو عمده متحدین دي او قطر په سیمه کې د امریکا د سترې پوځي اډې کوربه دی.