- د سعودي عربستان د حج او عمرې وزارت د کرونا ویروس له امله سږ کال د حج په مراسمو کې د بهرنیو حاجیانو پر ګډون بندیز ولګوه.
یاد وزارت په یوې اعلامیې کې ویلي چې سږ کال به یوازې د سعودي عربستان محدود شمیر وګړي د ټولنیزې فاصلې په مراعتولو سره د حج مراسمو کې ګډون وکړي.
د رویټرز خبري اژانس د راپور له مخې د سعودي عربستان د حج او عمرې وزارت دغه اعلان پرون دوشنبه جون ۲۲ (چنګاښ۲) کړی دی.
د سعودي عربستان حکومت ویلي چې دغه پرېکړه یې په کرونا ویروس د حج د زیارت کوونکو د اخته کېدو د مخنیوي په هدف کړې ده.
رویټرز خبري اژانس د معلوماتو له مخې تر دامهاله په سعودي عربستان کې ۱۶۰۰۰۰ تنه په کرونا ویروس اخته شوي او ۱۳۰۷ نور ورڅخه مړه شوي دي.
هر کال د نړۍ له ګوټ ګوټ څخه په میلیونونو مسلمانان په سعودي عربستان کې د حج په مراسمو کې ګډون کوي.خو اوس مهال کې دا لومړنی ځل دی چې د کرونا ویروس له امله د حج مراسمو کې د بهرنیو زیارت کوونکو پر ګډون بندیز لګول کیږي.
سعودي عربستان په نړۍ کې د کرونا ویروس خپرېدو له امله تر دې مخکې د عمرې پر اداکولو هم بندیز لګولی و.
له افغانستان څخه هم تر دې مخکې هر کال په زرګونو کسان د حج مراسمو کې د ګډون لپاره سعودي عربستان تلل.
د افغانستان د حج او اوقافو وزارت روانه میاشت امریکاغ غږ ته وویل چې د حج پروسې تر سره کولو په اړه د سعودي عربستان د حج او عمرې وزارت د وروستۍ پریکړې په تمه دي.
د حج او اوقافو وزارت د خپرونو مسؤل فضل محمد حسیني نن سې شنبه هم امریکا غږ ته وویل چې په دې اړه یې د سعودي د حج او عمرې وزارت اعلامیه تر لاسه کړې چې وروسته خپل نظر څرګند کړي.