ټاکل شوې د راتلونکې پنجشنبې په ورځ په مسکو کې د افغان سولې په اړه د روسیې، امریکا او چین د استازو دوهمه درې اړخیزه ناسته تر سره شي.
په کابل کې د روسیې سفارت د سې شنبې په ورځ د «اپرېل پر ۲۳مه» په یوې اعلامیه کې ویلي، چې په دغه درې اړخیزه ناسته کې به د افغانستان لپاره د یادو هېوادونو ځانګړي استازي ګډون وکړي.
بیان وايي:" ټاکل شوې په دغه غونډه کې د افغانستان پر حالاتو، په دوحه کې د امریکا او طالب استازو ترمنځ پر خبرو او همدارنګه د افغانستان د ملي پخلاینې پر بهیر هم خبرې وشي."
د روسیې سفارت زیاتوي چې دغه درې اړخیزه غونډه د افغانستان په اړه د خبرو یو نوی نوښت نه دی، بلکې د افغانستان د سولې د بهیر په اړه د نړیوالو شرایطو د برابرولو لپاره د نړیوالو لوبغاړو یوه هڅه ده چې له دغو هڅو څخه د ملاتړ په هدف تر سره کېږي.
په دغه غونډه کې د افغانستان لپاره د روسیې ځانګړی استازی، ضمیر کابلو، د امریکا ځانګړی استازی زلمی خلیلزاد او د چین ځانګړی ډنګ زیجن ګدون کوي.
روسیه پر داسې مهال د افغان سولې په اړه د درې اړخیزې ناستې کوربتوب کوي چې د افغان سولې په اړه د امریکا د بهرنیو چارو وزارت ځانګړي استازي زلمي خلیلزاد د افغان سولې په تړاو اوم سفر پیل کړی دی.
د امریکا د بهرنیو چارو وزارت د معلوماتو لهمخې ټاکل شوې ښاغلی خلیلزاد د خپل دغه شل ورځني سفر په ترڅ کې له بریتانیې روسیې، پاکستان او هند څخه د لیدنې په ترڅ کې د افغان سولې له بهیر څخه د نړیوال ملاتړ د راجلبولو هڅه وکړي.
تېره دری اړخیزه ناسته
د یادونې وړ ده چې د افغان سولې په اړه بله ورته درې اړخیزه ناسته د تېرې مارچ میاشتې پر ۲۲مه په امریکا کې جوړه شوې وه.
په دغه ناسته کې د افغانستان لپاره د امریکا، روسیې او چین ځانګړو استازو هوکړه وکړه چې په افغانستان کې د تلپاتې سولې ټینګېدو لپاره به ګډې هڅې کوي.