پداسې حال کې چې کرملین ویلي چې پلان لري د جمعې په ورځ په رسمي توګه د اوکراین څخه څلور نیول شوې سیمې په ځانګړو مراسمو کې د خپلې خاورې سره یو ځای کړي، خو بل پلو بیا اوکراین او متحدینو یې د روسیې دا اقدام غیر قانونی بللی او په روسیې یې د نویو بندیزونو لګولو ژمنه کړې.
د کرملین ویاند دمیترې پیسکوف پنجشنبه سپټمبر ۲۹ (تلې۷) خبریالانو ته وویل چې ټاکل شوې پدې ځانګړو مراسمو کې جمهور رئیس ولادمیر پوتین او د دې څلورو سیمو لپاره د روسیې لخوا نوي ټاکل شوي مشران برخه واخلي.
روسیې پدې څلورو نیول شویو سیمو کې تیره اوونۍ د مسکو سره د یو ځای کیدو لپاره ټولپوښتنه وکړله او داسې ویل کیږي چې روسي ځواکونو خلک د ټوپک په زور اړ کړي دي چې په رای ګیرۍ کې برخه واخلي.
د اوکراین په ختیځ دونباس سیمه کې مسکو پلوه بېلتون غوښتونکو او د اوکراین د روسیې تر کنټرول لاندې د خرسون سیمې کریملین پلوه چارواکو د سپتمبر په شلمه وویل چې غواړي د سپټمبر له ۲۳ څخه تر ۲۷ پورې د روسیې د خاورې سره د یو ځای کیدو لپاره ټولپوښتنه وکړي.
په ۲۰۱۴ کې وروسته له هغه چې په ټول اوکراین کې مظاهرو د اوکراین کریملین پلوه ولسمشر له واکه لرې کړ، د ډونباس صنعتي سیمې لویې برخې د مسکو ملاتړو بېلتون غوښتونکو تر کنټرول لاندې شوې.
روسیې هغه مهال د کریمیا ټاپو وزمه له اوکراین څخه جلا او د خپلې خاورې سره یوځای کړه چې د کیف او لویدیځ له خوا پرې نیوکې وشوې او په مسکو باندې یې بندیزونه ولګول.
غبرګونونه:
غربي هیوادونو او د اوکراین متحدینو د روسیې د دې اقدام په ځواب کې پر مسکو باندې د بندیزونو خبر ورکړی.
د جرمني صدراعظم اولف شولتز په ټویټر کې لیکلي چې د اوکراین جمهور رئیس ولادمیر زلینسکي ته یې ډاډ ورکړی چې د ټولپوښتنې نتیجه به په رسمیت ونه پیژني.
ښاغلي شولتز ویلي، " کوم جعلي ریفرنډمونه چې د اوکراین په غیر قانوني توګه نیول شویو سیمو کې پوتین وکړل، بې ارزښته دي."
په عین حال کې د سپینې ماڼۍ ویاندې کارن ژان پییر ویلي چې روسیه پدې جعلي ټولپوښتنو سره غواړي چې ځان سره د اوکراین د دې سیمو د یو ځای کولو لپاره پلمه پیدا کړي او دا کار یې د ملګرو ملتونو د منشور او نړیوالو قوانینو څخه ښکاره سرغړاونه وبلله.
میرمن پییر وویل دا مهمه نده چې روسیه څه ډول ادعا لري خو دا سیمې به د اوکراین د خاورې برخه پاتې شي.
هغې زیاته کړه، " مونږ به په غبرګون کې د خپلو متحدینو او شریکانو سره کار وکړو چې په روسیې، د دې هیواد په افرادو او هغو ادارو اضافي بندیزونه ولګوو چې ددې اقدام ملاتړ کوي".
په عین حال کې د اروپایي کمیسیون مشرې ارسولا وان ډیر لیان ویلي چې د دې اقدام په ځواب کې به د روسیې په صادراتو نوي بندیزونه ولګوي او په کرملین د مهمو نظامي ټکنالوژیو د بندیز ساحه به لا پراخه کړي.
روسیې د اوکراین په دونیڅک، خیرسون، لوهانسک او زاپوریژیا سیمو کې چې د دې هیواد د خاورې ۱۵ په سلو کې برخه ده، ټولپوښتونه وکړله.