د روسیې ولسمشر ولادیمیر پوتین د پنجشنبې په ورځ نومبر دوهمه (لړم ۱۱) یو قانون لاسلیک کړ چې له مخې یې روسیه د اټومي ازموینو د بندیز له پراخ تړون څخه وایستله.
د ۱۹۹۶ کال تړون د اټومي وسلو د ژوندیو ازموینو په ګډون ټولې اټومي چاودنې منع کوي، خو دا تړون هیڅکله هم په بشپړه توګه پلي نه شو، ځکه چې ځینې کلیدي هیوادونو - د متحده ایالاتو او چین په ګډون – هغه هیڅکله تصویب نه کړ.
لوېدیځ روسیه تورنه کړې چې د تیرې فبرورۍ له میاشتې راهیسې چې په اوکراین یې یرغل کړی، په بې باکه توګه اتومي لفاظۍ کوي.
د امریکا د بهرنیو چارو وزارت د پنجشنبې په ورځ د یوې اعلامیې په خپرولو سره د روسیې د دغه اقدام په اړه ژوره اندیښنه څرګنده کړه او دا یې «په غلط لوري یو ګام» وباله.
په بیان کې راغلي: "په داسې حال کې چې د اوکراین پر ضد روسیې غیرقانوني جګړه دوام لري، دا اقدام د اټومي خطرونو او کړکېچ د زیاتولو لپاره د مسکو د انديښنې وړ او غلطو هڅو دوام دی."
پوتین تیره اونۍ د بالستیک توغندیو د تمرینونو څارنه وکړه چې د دفاع وزیر سرګي شویګو په وینا د نامعلوم دښمن په وړاندې د "لوی" غچ اخیستونکي اټومي برید لپاره تمرین دی.
پوتین همداشان تېره میاشت ویلي وو دې ته "چمتو نه دی چې ووایي" ایا روسیه به ژوندۍ اټومي ازموینې ترسره کړي او که نه.
د دې تړون د لغوه کولو قانون تیره میاشت د روسیې په پارلمان کې په چټکۍ سره تصویب شو.
د پارلماني بحث په ترڅ کې، د دوما (پارلمان) رئیس ویاچسلاو وولودین، وویل چې د دې تړون لغوه کولو اقدام د اټومي وسلو په اړه د متحده ایالاتو د "بد چلند" ځواب و.
که څه هم چې دا تړون هیڅکله په عمل کې پلی نه شو، خو د اټومي قدرتونو فرانسې او بریتانیا په ګډون د ۱۷۸هیوادونو لخوا تصویب شو، چې سمبولیک ارزښت لري.
ددې تړون ملاتړي وايي چې دا د اټومي وسلو د ژوندیو ازموینو پر وړاندې یو نړیوال معیار رامینځته کوي، خو منتقدین وايي د سترو اټومي ځواکونو له تصویب پرته، تړون واقعي بڼه نلري.
د روسیې پارلمان د ۲۰۰۰ کال د جون په میاشت کې شپږ میاشتې وروسته له هغې چې پوتین لومړی ځل ولسمشر شو، دا تړون تصویب کړی و.