هغه کورنۍ چې په دعوت و تبلیغ ډلې پورې تړاو لري، اولادونو ته د واکسین ورکولو څخه ډډه کوي.
د کندوز د کتلوي معافیت مسؤلین وايي چې په دعوت و تبلیغ ډلې پورې تړلي یو شمیر کسان چې د کندوز په ښار کې ژوند کوي، خپلو ماشومانو ته د پولیو واکسین نه ورکوي.
دغه کورنۍ په مختلفو بهانو خپل اولادونه د واکسین کولو لپاره د کمپاین په ورځو کې نه راوباسي، خو د کتلوي معافیت مسولین بیا وايي چې دوی به وهڅوي ترڅو واکسین وکړي.
پدې اړه د دعوت و تبلیغ د مرکز له مشرانو سره هم خبرې شوي دي، خو هغوی وايي چې د پولیو د څاڅکو ردول د کورنیو خپل کار دی، دوی چاته د واکسین د نه کولو خبره نه ده کړې.
Your browser doesn’t support HTML5
په کندوز کې یو شمېر کورنۍ خپلو اولادونو ته د پولیو څاڅکي نه ورکوي
داکټر عبدالکریم باجوړی وايي: "... د دې پر ځای چې مونږ په کلیو او بانډو کې د واکسینو د رد پیښې ولرو ځکه چې هلته د خلکو د علم کچه ټیټه ده، خو له بده مرغه مونږ د کندوز په ښار کې داسې کورنۍ لرو چې واکسین ردوي."
هغه زیاته کړه، زمونږ د معلوماتو له مخې دا هغه خلک دي چې د دعوت او تبلغ کار کوي.
په کندوز کې د کتلوي معافیت مسؤل، ډاکټر غلام جیلانيعطايي بیا وايي چې دوی د عامه پوهاوي شبکه چې له مختلفو ادارو جوړه شوې سره هم خبرې کړي او دغه کورنۍ به وهڅول شي چې اولادونو ته یې د پولیو څاڅکي ورکړي.
هغه وویل: "... زمونږ د عامه پوهاوي شبکه په دوه ولسوالېو کې کار کوي او دغه شبکه د ارشاد حج اوقاف، معارف، ولایت مقام، ولایتي شورا، د عامې روغتیا ریاست او نور همکارو مؤسساتو د استازو څخه جوړه شوی."
نوموړي زیاته کړه، هغوی سره موضوع شریکه شوې او د حج اوقاف ریاست دا مسؤلیت اخیستی چې له هغو کورنیو سره خبرې وکړي چې خپلو اولادونو ته د پولیو څاڅکي نه ورکوي.
د کندوز یو تن دینيعالم مولوي غیاث الدین حنفي وايي چې کورنۍ د خپلو اولادونو پر وړاندې مسولیت لري چې د هغوی د صحت خیال وساتي.
هغه وویل: "... د ناروغۍ تداوي د سنت طریقه ده او له ناروغۍ نه وړاندې د مرض وقایه هم تداوي ده چې دغه چارې په احادیثو او د پېغمبر په سیرت کې روښانه شوي دي."
ډاکټران وايي هغه ماشومان چې په پرله پسې ډول د پولیو د کمپاینونو پر وخت له څاڅکو خوړلو پاتې کیږي د کوزڼ کیدو خطر یې هم زیاتیږي.