د پاکستان د پنجاب په ایالت کې د ترهگرو د بریدونو نه وروسته په پاکستان کې د میشتو افغان کډوالو او د پاکستان پښتنو په ضد د تبعیض نه د ډکو اقداماتو رپورټونه خپاره شویدي.
د پنجاب حکومت دغه رپورټونه رد کړیدي خو په پنجاب او اسلام اباد کی اوسیدونکي قباېلي پښتانه او افغان مهاجر وایي چې د هغوي سره ډیر بد چلند کیږي.
یو افغان مهاجر شاو ولي چې کورنۍ یې د کندوز نه پاکستان ته مهاجره شوي، وایي چې دی په پاکستان کې زیږدلی دی او په اسلام اباد کې کار کوي. هغه وایي " مونږ کوم غیرقانوني کار نه دی کړی خو پولیس مو ځوروي. مونږ په پاکستان کې ژوند کوو نو دی ته هیڅ دلیل نه پیدا کیږي چې د دې ملک مخالفت وکړو."
په اسلام اباد کې د پښتنو سره د نژادي تبعیض په ضد احتجاجي مظاهره وشوه، په هغې کې پښتنو ځلمو او د مدني ټولنې فعالینو گډون کړی وو. هغوي د حکومت نه وغوښتل چې د پښتنو ضد اقدامات دې ژر تر ژره بند کړي.
په دغه مظاهرې کی گډون کونکي عبدالوزیر د امریکا غږ اردو څانگې ته وویل چې د پاکستان د اتباعو په توگه هغوي اساسي حقوق لري. هغه وایي چې پ" ه پښتنو شک سم کار ندي" ښاغلي وزیر زیاته کړه چې د " پاکستان د اساسي قانون په اساس مونږ د دی ملک په هر گوټ کې د اوسیدلو حق لرو."
په اسلام اباد کې د یو میلمستون مالک توقیر احمد کیاني وایي چې د افغانانو او پښتنو سره د تعصب نه ډک سلوک کیږي چې دا ښه خبره نه ده. هغه وایي " که چیری یو تن غلط کار وکړي، که هغه پاکستانی وي او که افغان، باید د هغوي سره یو ډول چلند وشي. د بیگناه افغانانو ځورول بیخي ظلم دی."
د پنجاب د قانوني چارو وزیر رانا ثنا الله د امریکا غږ سره په مرکې کې وویل چې د دې نه مخکې هم داسي شکایتونه ثبت شوي دي. خو هغه زیاته کړه چې کوم خاص قوم یې نه دی په نښه کړی او دغه تورونه بیخي بیځایه دي.