د کندهار امنیتي چارواکي وايي، په دغه ولایت کې نن غرمه یو څارنوال په غلچکي برید کې وژل شوی دی.
پېښه د ښار د دوهمي حوزې اړوند له مشرقي لېسې سره رامنځ ته شوې.
د کندهار د پوليسو وياند جمال بارکزي نن سې شنبه ډسمبر ۱۵ (لېندۍ ۲۵) امریکا غږ ته وویل چې برید کوونکی تر پېښې وروسته له سیمې څخه تللی، خو وايي، امنیتي ادارې یې د نیولو په هڅه کې دي.
ده وويل:"د استناف څارنوالۍ د تحقیق څارنوال محمد نبي مظلوم چي په ډنډ ولسوالۍ کې دنده لرله د وسله والو ترهګرو لخوا د دوهمي حوزې په اړوند سيمه کې ترور شوی موږ يې د عاملينو د نيول کيدو په هڅه کې يو."
په کندهار کي د جګړو تر څنګ غلچکي بريدونه هم ډير شوي.
پرون هم ۴ تنه چي ۲ تنه يې پوليس وو د ښار په بيلابيلو برخو کي د غلچکيو بريدونو په ترڅ کې وژل شوي.
تر اوسه چا د نننۍ پېښې مسئوليت په غاړه ندی اخيستی.