د افغانستان د کرنې، اوبو لګونې او مالدارۍ وزارت وايي چې په روان کال کې د ننګرهار ولایت د جلغوزیو سږني حاصلات ۶۲۷ مټریک ټنو ته رسیږي چې دغه کچه د تېر کال په پرتله ۳۸ سلنه زیاته ده.
د دغه وزارت خبرپاڼه چې نن چهارشنبه اکټوبر ۲۸ (لړم ۷) خپره شوي وایي چې دغه ولایت کې د دغې مېوې د دودېدو لپاره یې یو شمېر اقدامات ترسره کړي دي.
د کرنې، اوبو لګونې او مالدارۍ وزارت ویلي: "ننګرهار کې د جلغوزې تولید هر کال په پراخېدو دی. د جلغوزو د ځنګونو پراخول او کروندګرو ته پوهاوی ورکول د جلغوزې د زیاتېدو لوی لاملونه دي."
د ننګرهار د کرنې ریاست د معلوماتو په اساس دغه ولایت کې څه باندې ۷۰ زره هکټاره ځمکې باندې ځنګلونه شته چې ۱۶ سلنه یې د جلغوزیو ونو پوښلې ده.
په ورستیو کلونو کې د افغانستان جلغوزې د ښه کیفیت له امله نړیوالو مارکېټونو ته لاره پیدا کړې ده.
له دې ډلې چین د افغانستان حکومت سره هوکړه کړې چې د دغه هېواد جلغوزې وارد کړي.
د چین سربیره ۱۶ نورو هېوادونو هم د افغانستان د جلغوزیو د اخیستلو تقاضا لري.
بهر ته د جلغوزې صادرول افغانستان کې د دغې مېوې د پروسس اړتیا پیدا کړې چې دوه کاله مخکې د سیمې په کچه د جلغوزیو د پروسس یوه معیاري فابریکه کابل کې پرانیستل شوه.
دغه فابریکه اوس مهال جلغوزي پروسس او صادرولو ته چمتو کوي.