د جنوبي کوریا چارواکو د شنبې په ورځ وویل چې د شمالي کوریا ستر مشر کیم جونګ اون پخپله د جنوبي کوریا مشر مون جائه ته بلنه ورکړې چې هیواد ته سفر وکړي.
د شمالي کوریا د مشر خور کیم یو جونګ د شنبې په ورځ په سیول کې د جمهوري ریاست په ماڼې کې د جنوبي کوریا مشر ته د خپل ورور یو شخصي پیغام ورساوه چې له هغه سره په شمالي کوریا کې وګوري.
د یوې لسیزې په موده کې به دا لومړی ځل وي چې د دواړو هیوادونو مشران له یو بل سره مخامخ ګوري.
دغه لیدنه به د ښاغلي مون لپاره یو بری وي چې له خپلو شمالي ګاونډیو سره د سوله ئیزو ارتباطاتو د ساتلو لپاره هڅه کوي.
خو دغه خبر ښايي په واشنګټن ښه اغیزه ونلري. د ټرمپ اداره اندیښنه لري چې شمالي کوریا، د امریکا او جنوبي کوریا ترمنځ د درز د اچولو هڅه کوي.
دغه خبر په داسې حال کې خپریږي چې ملګري ملتونه د شمالي کوریا په ګوښه شوی رژیم باندې خپل فشار ته دوام ورکوي څو د خپل اټومي وسلو او توغندیو د پروګرام له امله ورته جزا ورکړي.
دا معلومه نه ده چې دغه سفر به کله ترسره شي، خو د احتمال په اړه یې د مون اداره نښې نښانې څرګندوي.