د ملګرو ملتونو د مرستو د همغږۍ ادارې (اوچا) وايي چې د افغانستان په مختلفو ولایتونو کې د جګړې زیاتوالي له امله څه باندې ۲۰۵زره افغانان له خپلو اصلي سیمو څخه بېځایه شوي دي.
د دغې ادارې د رپوټ په اساس په جګړې سربېره په افغانستان کې وچکالي او طبیعيي پېښو هم له ۲۴زره زیات افغانان د خپلو مینو پرېښودلو ته اړ کړي دي.
په رپوټ کې راغلي چې یوازې په تېره اونۍ کې د کندز، تخار، بدخشان او بغلان ولایتونو څه باندې ۵۶زره اوسېدونکي د جګړو له امله بېځایه شوي دي.
اوچا ویلي چې په افغانستان کې د جګړو او طبیعيي پېښو له امله د ټولو بېځایه شویو کورنیو له شمېرې کابو ۱۲۴زره کسانو بیړنۍ بشري مرستې ترلاسه کړي دي.
د افغانستان د دفاع وزارت د معلوماتو په اسااس اوسمهال لږ تر لږه په ۱۵ ولایتونو کې د افغان ځواکونو او طالبانو ترمنځ جګړه روانه ده.
له دې وړاندې د افغانستان د کډوالو او راستنېدونکو چارو وزارت ویلي و چې د جګړې د زیاتوالي له کبله په زیاتره ولایتونو کې د کورني بېځایه شویو شمېر په بېساري توګه لوړ شوی دی.
دغه وزارت اندېښنه ښودلې چې د افغانستان په مختلفو برخو کې د جګړو او نښتو دوام به د کورني بېځایه شویو په شمېر کې لا زیاتوالی راولي.
د اوچا د رپوټ په اساس د جګړو له امله د ولسوالیو مواصلاتي لارې تړل شوي چې ورسره اړمنو کورنیو ته د د مرستې رسونې بهیر اغیزمن شوی دی.