په کندهار کې ولایتي چارواکي وايي، چې د ملي امنیت ځانګړو ځواکونو تیره شپه ( لړم لومړۍ) د هلمند د خانشین په ولسوالۍ کې د عملیاتو په ترڅ کې د القاعدې د شبکې یو غړی نیولی دی.
د کندهار د والي ویاند بهیر احمدي امریکا غږ ته د دغو عملیاتو په اړه د معلوماتو پرمهال که څه هم د القاعدې د شبکې د دغه نیول شوي غړي د هویت په هکله جزئیات ورنکړل، خو ز یاته یې کړه، چې افغان ځواکونو د عملیاتو پر مهال د القاعدې د شبکې د پټنځي څخه دیرش پاکستاني پیژندګلوۍ کارتونه او ځینې نور اسناد هم ترلاسه کړي دي.
ښاغلي احمدي وویل " د القاعدې شبکې دا غړی د افغان ځانګړو ځواکونو لپاره مهم هدف و، چې له یوه بل کس سره یو ځای د خانشین په ولسوالۍ کې نیول شوی. دغه کس چې ډيرمهم دی په هلمند او جنوبي ولایتونو کې به د القاعدې شبکې د پلانونو په اړه مهم معلومات ورڅخه تر لاسه شي له دوی سره دېرش د هویت هغه کارتونه چې د ډیورنډ پولې یوې او بلې خواته به يې د نفوذي کسانو لپاره کارول هم نیول شوي".
هغه وویل، چې د دغو عملیاتو جزئیات به ژر له رسنیو سره شریک شي. تر دې مخکې د روانې میاشتې په پيل کې د ملي امنیت ریاست د هلمند په موسی کلا ولسوالۍ کې د هند د نیمې اوچې لپاره د القاعدې د شبکې د پاکستاني الاصله مشر عاصم عمر د وژل کیدو راپورونه ور کړي وو.
خو طالبانو د عاصم عمر وژل کیدل بیا رد کړل.
امنیتي مقامات ادعا کوي، چې په هلمند ولایت کې د القاعده شبکې د غړو حضور له تیرو څو میاشتو راهیسې زیات شوی دی.
هلمند ولایت کې وسله وال طالبان پراخه حضور لري.