د ننګرهار سیمه ییز چارواکي وايي، په دغه ولایت کې د داعش ډلې یو مهم قوماندان په هوايي برید کې وژل شوی دی.
د ننګرهار د والي ویاند عطاءالله خوګیاڼي د چهارشنبې په ورځ د «وري میاشتې پر ۱۴مه» امریکا غږ ته وویل، چې دغه وژل شوی قوماندان مولوي سلیمان نومېږي چې تېره شپه له خپلو پنځو نورو ملګرو سره وژل شوی دی.
خوګیاڼيوویل:"دغه هوايي برید تېره شپه د بېلوټه الوتکې لخوا د اچین ولسوالۍ د عبدالخیل تنګي په سیمه کې شوی دی".
پر همدې مهال د ننګرهار پولیس چارواکي هم وايي، چې دغه وژل شوي قوماندان د تاوتریخوالې په ګڼو پېښو کې لاس درلود.
دا په داسې حال کې ده چې ولسمشر محمد اشرف غني څه موده مخکې ننګرهار ته د سفر پرمهال، د دغه ولایت شینواري ولسوالي د داعش له حضور څخه پاکه اعلان کړې وه.
خو د دغه ولایت چارواکي بیا وايي، چې د شینوارو ولسوالۍ په ځینو برخو په ځانګړي ډول له پاکستان سره پر پوله لا د داعش ډلې ګواښ موجود دی.