خامنه‌ یي په تهران کې د حماس د مشر سره کتلي دي

د ایران دولتي خبري اژانس د نومبر په ۵ (لړم ۱۴) خبر ورکړ چې د ایران مذهبي مشر ایت الله علي خامنه يي په تهران کې د حماس ډلې د سیاسي دفتر له مشر اسماعیل هنیه سره کتلي دي.

د ایرنا خبری اژانس په راپور کې ویل شوي چې هنیه "په دې کتنه کې په غزه کې د وروستیو پرمختګونو او د صهیونیستي رژیم د جنایتونو او همداشان په لویدیځه غاړه کې د پرمختګونو په هکله خامنه یي ته راپور وړاندې کړ."

دا نه ده څرګنده شوی چې دا کتنه په دقیقه توګه کله شوې، خو د ایرنا د راپور څخه یوه ورځ مخکې د حماس چارواکو ویلي وو چې د دغې ډلې مشر په وروستیو ورځو کې له خامنه يي سره کتلي دي.

د ایرنا خبری اژانس د رپوټ له مخې خامنه یي "د غزې د خلکو صبر او استقامت یو ځل بیا وستایه او د خواشینۍ په څرګندولو سره یې په غزه کې د صیهونیستي رژیم جنایتونه چې د امریکې او ځینو لویدیځو هیوادونو په مستقیم ملاتړ ترسره کیږي، د صهیونیستي اشغالګرو په وړاندې د فلسطین د مقاومت له ځواکونو څخه د ملاتړ لپاره د ایران د اسلامي جمهوریت په دایمی سیاست ټینګار وکړ."

ایران تل ویلي چې د حماس ملاتړ کوي، خو ایراني مقاماتو ویلي چې تهران د حماس له خوا پر اسرائیل په وروستي برید کې لاس نه لري.

خامنه يي له اسماعیل هنیه سره په کتنه کې همداشان "د غزې له خلکو سره د اسلامي هېوادونو او نړیوالو سازمانونو د جدي اقدام او د اسلامي دولتونو د هر اړخیز او عملي ملاتړ پر اړتیا هم ټینګار کړی دی."

ایراني چارواکو اسرائیل ته خبرداری ورکړی، چې که پر غزې بریدونه دوام وکړي، په سیمه کې به د جګړې لمن پراخه شي او اسرائیل به له سختو پایلو سره مخ شي.

خو اسرائیلي مقاماتو د اوربند غوښتنې ته غوږ نه دی نیولی او تل یې ټینګار کړی، چې د غزې جګړه به تر هغه دوام وکړي تر څو ټول یرغمل شوي کسان د حماس له منګولو نه وي ازاد شوي او دغه ډله په بشپړه توګه له منځه تللې نه وي.

د اکټوبر د میاشتې د اوومې نیټې راهیسې چې د اسرائیل او حماس تر منځ جګړه پیل شوی تر اوسه د اسرائیلي مقاماتو په وینا په اسرائیل کې ۱۴۰۰ کسان وژل شوي او حماس تر ۲۴۰ زیات کسان یرغمل نیولي دي.

پر اسرائیل د حماس د برید په غبرګون کې اسرائیلي ځواکونو پر غزه هوایي، ځمکني او سمندري بریدونه کړي چې د غزې د روغتیا وزارت په وینا له ۹۸۰۰ زیات فلسطینیان په کې وژل شوي دي چې اکثر یې ماشومان او ښځې دي او په زرګونو نور ټپیان شوي دي.