د ایران د قم ولایت د یو بانک مدیر یوې ښځې ته چې حجاب یې نه درلود د خدمتونو د وړاندې کولو له امله له دندې ګوښه کړای شوی دی. دا پداسې حال کې دي چې په ایران کې د سپتمبر په میاشت کې د پولیسو په توقیف کې د مهسا امیني له مړینې وروسته پیل شوې مظاهرې اوس هم روانې دي.
د کردستان ولایت اوسیدونکې مهسا امیني د «اسلامي حجاب» د نه مراعاتولو له امله نیول شوې وه.
د ایران د مهر خبري اژانس د دغه بانک د نوم له ښودلو پرته خبر ورکړی، چې د دغه بانک مدیر د پنجشنبې په ورځ یوې ښځې ته چې ټکری یې نه وه پرسر کړی، بانکي خدمات وړاندې کړي وو.
د مهر اژانس د قم د والي د مرستیال احمد حاجيزاده، له قوله لیکلي چې د بانک مدیر د والي په امر له کاره ګوښه کړای شوی دی.
په ایران کې اکثر بانکونه دولتي دي او حاجي زاده وویل چې د بانکونو مدیران مسولیت لري چې د حجاب قانون پلي کړي: "د دیني لارښوونو له مخې موږ ټول باید پدې فریضې عمل وکړو، نو په نننیو شرایطو کې ټول مکلف دی چې د منکراتو په اړه پولیسو ته صرف لفظي خبر ورکړي چې د دې سرغړونکو سره د چلند قانوني پروسه بشپړه شي."
د ایران د بشري حقونو د ډلو د رپوټونو له مخې، د امنیتي ځواکونو له خوا د مظاهرو د ځپلو په نتیجه کې په ټول هېواد کې ۴۴۸ کسان وژل شوي او څه باندې ۱۸ زره نور نیول شوي دي.
خو د ایران حکومت تر اوسه د هر ډول شمیرو د وړاندې کولو څخه ډډه کړې ده.
په ایران کې د ۱۹۷۹ کال د اسلامي انقلاب نه څلور کاله وروسته د حجاب اغوستل اجباري شول.
د روان کال په جولای میاشت کې د ایران ولسمشر ابراهیم رئیسي د حجاب اغوستلو د قانون د سخت تطبیق امر وکړ.