د هند د کرکټ لوبډلې ملي لوبغاړو د اسټرالیا سره په دریمې یو ورځنۍ نړیوالې لوبې کې چي د جمعي په ورځ (مارچ ۸مه) وشوه، د ورزشي خولیو پر ځای د هند پوځي خولۍ په سر کړې وې.
د هندي لوبډلې کپتان ویرات کوهلي ویلي چې "دا خولۍ یې د شهیدانو او د هغوي کورنیو ته د درناوي لپاره په سر کړي." ښاغلي کوهلي چې نظامي خولۍ یې په سر وه، وویل چې لوبغاړو پریکړه کړې د دې لوبې فیس د دفاع وزارت یو ځانګړي وجهي صندوق ته ورکړي چې د وژل شویو پوځیانو کورنیو سره مرسته کوي.
داسي ویل کیږي چې د ورزشي خولیو پر ځای د نظامي خولیو په سر کول د پخواني کپتان مهیندار سنګ دهوني نظر و.
دوهني د هند په پوځ کې افتخاري ډګرمن هم دی.
هندي لوبغاړو دا کار د هغو څلویښتو پوځیانو د درناوي لپاره کړی چې د هند تر کنترول لاندې کشمیر کې په ځانمرګي برید کې ووژل شول. د جیش محمد وسله والې سخت دریزه ډلې د برید د کولو ادعا کړي. هند په پاکستان تور لګوي چې دې ډلې ته یې ځای ورکړی. هند په پوځیانو د برید نه وروسته په پاکستان کې د جیش محمد ډلې په مرکز هوایي بمبارد هم وکړ چې دواړه هیوادونه یې دریمې جګړې ته نږدې کړي و.
د پاکستان غبرګون:
پاکستان د کرکټ د نړیوالې شورا نه غوښتي چې د هندي لوبغاړو د دې کار پر ضد اقدام وکړي. د پاکستان د بهرنیو چارو وزیر شاه محمود قریشي ویلي "نړۍ وکتل چې هندي لوبغاړو نظامي خولۍ په سر کړې وې، نو آی سي سي دا څنګه ونه کتل؟"
د هندي کشمیر په پلوامې کې په هندي پوځیانو د برید نه وروسته د هند کرکټ بورډ دا هڅه هم کړې چې د کرکټ په نړۍ کې پاکستان ګوښه کړي. د هند کرکټ بورډ د کرکټ د نړیوالې شورا نه غوښتي چې د پاکستان سره د لوبو کولو سره مقاطعه وکړي خو دا غوښتنه یې نده منل شوې.
د هند یو شمیر اوسیدونکي حتی د خپل ټیم نه دا هم غواړي چې د کرکټ په نړیوال جام کې دې د پاکستان سره لوبه نکوي. د هغوي دا لوبه د جون د میاشتې په شپاړلسمې نیټې د انګلستان د مانچیسټر په ښار کې کیږي.