په هرات او بادغیس ولایتونو کې د تېرې پنجشنبې ماښام راپدېخوا د بارانونو له امله راوتلو سېلابونو خلکو ته ځاني او مالي زیانونه اړولي دي.
د هرات سیمه ییزو چارواکو د جمعې په ورځ د «وري میاشتې پر ۱۶مه» امریکا غږ ته وویل، چې تر دامهاله په سېلابونو کې د مړه شوو کسانو له ډلې د دوو ماشومانو په ګډون د اوو تنو جسدونه پیدا شوي دي.
د دغه ولایت د طبیعي پېښو سره د مبارزې ادارې مشر عبدالحمید مبارز همدارنګه وویل، چې د هرات ـ بادغیس د لویې لارې پر سر د مسافرینو ډک څلور موټرونه سېلابونو وړي چې تر دا مهاله یې ۱۰ مسافرین لا نه دي پیدا شوي.
ښاغلي مبارز زیاته کړه، چې د راوتلو سېلابونو له امله خلکو ته ګڼ مالي زیانونه هم اوښتي دي.
پر همدې مهال د بادغیس د والي ویاند جمشید شهابي امریکا غږ ته وویل، چې د دغه ولایت په لامان او قعله نو سیمه کې د سېلابونو له امله د دوو ماشومانو په ګډون څلور تنه مړه شوي دي.
ښاغلي شهابي زیاته کړه:"سېلابونه په دومره اندازه شدید و چې په سیمه کې د خلکو ګڼ کورونه او زارعتي ځمکې له منځه وړي دي."
نوموړي زیاته کړه چې د ژغورنې ډلې کار کوي تر څو زیانمن شوي سیمې او کورنۍ مشخصي کړي.
ویل کېږي، چې سېلابونو د هرات ـ بادغیس ترمنځ لویه لار هم زیامنه کړې او د لامان په نوم سیمه کې دغه لویه لار د ټرافیکو پر مخ بنده شوې ده.
د یادونې وړ ده چې د افغان چارواکو او بېلابېلو خیریه ټولنو د راپورونو لهمخې په افغانستان کې د ژمې په اوږدو کې د بارانونو او سېلابونو له امله لسګونه کسان مړه شوي دي.