د افغانستان د عامې روغتیا وزارت وايي، چې په هرات ولایت کې یو کس د کروناویروس په ناروغۍ باندې اخته شوی دی.
دغه وزارت پرون په هرات ولایت کې د کروناویرویروس د درېیو شکمنو پېښو د ثبتولو خبر ورکړ. دغه درې کسان د ایران له قُم ښار څخه هرات ته راغلي وو.
د روغتیا وزیر فیروزالدین فیروز د دوشنبې په ورځ د فبروري په ۲۴مه (کب پنځمه) خبریالانو ته وویل، چې له دغو درېیو شکمنو کسانو څخه یو یې د کروناویروس په ناروغۍ اخته شوی دی.
ښاغلي فیروز په هرات کې د بیړني حالت اعلان وکړ او د دغه ولایت له اوسېدونکو څخه یې وغوښتل، چې نورو ولایتونو ته له تګ راتګ ډډه وکړي.
د افغانستان د روغتیا وزیر له هوايي شرکتونو څخه هم وغوښتل، چې هرات ته خپل پروازونه محدود کړي.
ښاغلي فیروز وویل، چې هرات کې د کروناویروس د مخنیوي لپاره بشپړ تیاری نیول شوی او په دغې ناروغۍ د اخته کس روغتیايي حالت مخ په ښه کېدو دی.
هغه وویل، چې دغه کس تازه د ایران له قُم ښار څخه هرات ته ستون شوی وو.
د روانې کب میاشتې په لومړۍ ایراني رسنیو د دغه هېواد په قُم ښار کې د کروناویروس په ناروغۍ د اخته دوو کسانو د مړینې خبر ورکړ.
د دغه خبر له نشرېدو وروسته افغانستان په موقت ډول له ایران سره د تګ راتګ ټولې لارې وتړلې.
په ایران کې نږدې ۲.۵ میلیونه افغان مهاجر ژوند کوي.
د کرونا ویروس د لومړي ځل لپاره د ۲۰۱۹ کال په ډیسمبر کې د چین د هوبي ولایت په ووهان ښار کې تشخیص شو.