د اردن د بهرنیو چارو وزارت د هغه توغندي برید ملامتي په اسرائیل واچوله چې د سه شنبې په ورځ د غزې په یو روغتون ولګید او د حماس چارواکو پر وینا پکې لږ تر لږه ۵۰۰ تنه وژل شویدي.
د وزارت په اعلامیې کې دا برید په سختو ټکو غندل شوی. په اعلامیې کې راغلي، "اسرائیل د دې ناوړې پیښې مسؤلیت په غاړه لري".
خو بل پلو بیا د اسرائیل پوځ ویلي چې دا توغندی په فلسطین کې وسله والو ډلو وار کړی چې د توغولو پر وخت ترې اشتبا شوې.
د اسرائیل د پوځ په اعلامیې کې ویل شوي چې د هغوي د معلوماتو له مخې په غزې کې "ترهګرو" ګڼ شمیر توغندي وار کړي چې د اهلي العربي روغتون څخه نږدې تیر شوي او دا روغتون پکې لګیدلی دی.
د پوځ په اعلامیې کې ویل شوي، " د ګڼو استخباراتي سرچینو له مخې چې زمونږ په لاس کې دي پکې ښودل کیږي چې د اسلامي جهاد ډله د دې توغندي دې ناکامه توغیدو کې مسؤلیت لري چې په غزې کې په روغتون کې لګیدلی دی".
خو د اسلامي جهاد ډلې د اسرائیل د پوځ دا تورونه "درواغ" بللي.
دې ډلې په سیمه ایز وخت چارشنبه سهار وختي په یوې اعلامیې کې ویلي چې "صیهونیستي دښمن سخت کوښښ کوي چې ځان د مسؤلیت څخه بچ کړي او معمول سره سم د ملامتۍ ګوته په فلسطین کې د اسلامي جهاد په غورځنګ اچوي".
د غزې په روغتون دې برید څخه وروسته د امریکا جمهور رئیس جو بایډن اردن ته خپل سفر ځنډولی.
جمهور رئیس بایډن په اعلامیې کې ویلي چې د غزې په روغتون د چاودنې له کبله په "خواشینی" دی او امنیتي سلاکارانو ته یې امر کړی چې پدې هکله نور جزیات راټول کړي.
په اعلامیې کې راغلي، " زه د اهلي عرب په روغتون کې په چاودنې خواشیین او په ژوره توګه خفه یم".
د امریکا جمهور رئیس همدرانګه ویلي چې د چاودنې څخه وروسته په سمدستي توګه یې اردن د باچا عبدالله او اسرائیل د صدراعظم بنجامین نیتن یاهو سره خبرې کړیدي.
د سپینې ماڼۍ په اعلامی کې ویل شوي چې د اردن باچا عبدالله سره تر سلا مشورو وروسته او دا چې د فلسطین جمهور رئیس محمود عباس د څو ورځو لپاره ملي ماتم اعلان کړی، جمهور رئیس بایډن اردن ته خپل پلان شوی سفر ځنډولی.
ټاکل شوې وه چې بایډن په اردن کې د پاچا عبدالله، د مصر جمهور رئیس عبدالفتاح السیسي او فلسطین د جمهور رئیس محمود عباس سره کتلی و.
په اعلامیې کې همدرانګه ویل شوي چې جمهور رئیس بایډن په روغتون کې د بې ګناه کسانو وژل کیدو په خاطر خپلې ژورې خواشینۍ شریکې کړي او ټپي شويو ته یې عاجله شفا غوښتې.
په اعلامیې کې همدارنګه راغلی چې بایډن به د اسرائیل سره د ملاتړ څرګندولو تر څنګ په راتلونکو ګامونو سلا مشورې وکړي.
د ایران د بهرنیو چارو وزیر امیر حسین عبداللهیان ویلي چې په چاودنې کې زرګونه کسان وژل شوي. د ایران دې تر ټولو جګپوړي دیپلومات د اکس په ټولنیزې شبکې کې اسرائیل تر داعش منفور بللی او له نړۍ یې غوښتي چې د دې "جعلي رژیم او وژلو ماشین" پر ضد یو موټی شي.
په عین حال کې د ترکیې جمهور رئیس رجب طیب اردوغان د غزې په روغتون ددې برید غندلو تر څنګ ویلي چې "دا اسرائیل د بریدونو تازه نمونه ده چې تر ټولو اساسي بشري ارزښتونو څخه خالي دي".
اردوغان د اکس په ټولنیزې شبکې ویلي، "ټول بشریت ته بلنه ورکوم چې په غزې کې د دې بې ساري ظلم د بندولو لپاره اقدام وکړي".
د ترکیې جمهور رئیس د دې برید ملامتي په اسرائیل اچولې چې د هغه په وینا "بې ګنا ماشومانو او میرمنو پکې پنا اخیستې وه".
ها خوا بیا د اسرائیل صدراعظم بنجامین نیتن یاهو ویلي چې د غزې پدې روغتون برید د اسرائیل دفاعي ځواکونو نه بلکې "وحشي ترهګرو" کړی.
هغه لیکلي، "ټوله نړۍ باید پوه شي: هغوي چې په ظالمانه توګه زمونږ ماشومان قتلوي، خپل ماشومان هم قتلوي".
د فلسطین عامې روغتیا وزارت ویلي چې پدې روغتون کې د جګړې له کبله بې ځایه شویو کسانو پنا اخیستې وه.
ملګرو ملتونو هم ویلي چې د غزې تړانګې پدې روغتون برید په "بشپړه توګه نه منل کیدونکی" دی او پدې یې ټینګار کړی چې د مسؤلو کسانو سره باید حساب کتاب وشي.