د فراه سیمه ییز چارواکي وايي وسله والو طالبانو پرون یکشنبه ناوخته د دغه ولایت د بالابلوک ولسوالۍ په «شیوان» سیمه کې د ملي اردو یوې قرارګاه کې چاودنه کړې.
د فراه والي جنرال تاج محمد جاهد امریکا غږ ته وویل چې وسله والو طالبانو دغه قرارګاه ته یو تونل رسولی و او تر هغه وروسته یې د چاودېدونکو موادو په واسطه چاودنه کړې ده.
نوموړي زیاته کړه چې په دغه پېښه کې د ملي اردو ۷ سرتیري وژل شوي او پنځه نور سرتیري د ملي اردو یوې بلې قرارګاه ته انتقال شوي دي.
د فراه د والي په وینا تر دغه چاودنې وروسته له هلمند ولایت څخه د راغلو وسله والو طالبانو او افغان سرتیرو ترمنځ سخته جګړه هم شوې چې د دوشنبې تر سهار پورې روانه وه.
د نوموړي د معلوماتو په اساس په دغه جګړه کې پنځه وسله وال طالبان وژل شوي او نژدې ۱۰ تنه نور ټپیان شوي دي.
بلخوا د فراه د ولایتي شورا یو غړی شاه محمود نیعمي وایي چې په دغه قرارګاه کې د ملي اردو ۲۵ سرتیري مېشت و چې په خبره یې یوازې پنځه تنه یوې بلې قرارګاه ته انتقال شوي دي.
هغه وویل چې په دغه چاودنه کې د تلفاتو شمېر زیات دی، خو کره ارقام یې ونه ښودل.
وسله والو طالبانو تر دا مهاله په دې اړه څه نه دي ویلي.
بالابلوک د دغه ولایت له دوو نورو نا امنه ولسوالیو بکوا او خاک سفید او د هرات ولایت له شینډډ ولسوالیو سره پوره لري او د چارواکو په وینا په زیاتو برخو کې طالبان حضور لري.