د کندهار په سپین بولدک ولسوالۍ کې د پوليسو او وسله والو طالبانو ترمنځ نښته کې پنځه پوليس او اووه وسله وال طالبان وژل شوي.
ځايي مقامات وايي چې وسله والو طالبانوو تېره شپه د سپین بولدک ولسوالۍ د رباط پر امنیتي پوسته برید وکړ چې د نن سهار تر ۳ بجو پوري يې دوام در لود.
د کندهار یوه لوړ پوړي امنیتي مقام د نوم نه ښودلو په شرط د شنبې په ورځ د «مرغومې پر۲۲مه» امریکاغږ اشنا راډیو ته وويل چې د رباط پر امنیتي پوسته په برید کې پنځه پوليس او ۷ وسله وال طالبان وژل شوي.
دغه راز سرچینه زیاته وي چې په پېښه کې ۲ پوليس او ۶ وسله وال ټپیان شوي هم دي.
منبع وايي چې د رباط امنيتي پوستې ته پر لار کمکي پوليس هم د وسله والو له یوه کمين سره مخ شوي.
بلخوا د کندهار د والي ویاند عزیز احمد عزیز پېښه تائیده وي او وايي چې د اوښتو تلفاتو په اړه به يې وروسته معلومات خپاره کړي.
خو وايي چې سیمې ته د تازه دمه سرتېرو په رسېدو سره وسله وال له سیمې څخه تللي.
سپین بولدک چې په تېر کې د کندهار له امن سیمو څخه ګڼل کېده د نا امنیو پېښې پکښې له تېري يوې میاشتي راهیسې زیاتي شوي.
تېره اونۍ هم د پوليسو پر یوه مرکز په برید کې ۸ پوليس وژل شوي وو.
خپله وسله والو طالبانو د سپین بولدک ولسوالۍ د تېرې شپې وسله والې نښتې په اړه کومه تبصره نهده کړې.