د اکتوبر ۲مه د «عدم تشدد» نړيواله ورځ ده چې د سوله ييز حل او تاوتريخوالي سره د مبارزې په موخه لمانځل کيږي.
د افغانستان د بشري حقونو خپلواک کميسيون په همدې پلمه يو ځل بيا له ښکېلو غاړو د تاوتريخوالي د پای ته رسولو او سراسري اوربند غوښتنه کړې.
یاد کمېسیون د مذاکراتو پر دوام او پر سوله ييز حل ټینګار کړی.
دا ورځ پر داسې مهال لمانځل کیږي چې په افغانستان کې تر بل هر وخت د تاوتریخوالي کمېدو په اړه غوښتنې زیاتې شوي دي.
روانه اونۍ د افغانستان په دایکندي ولایت کې د تاوتریخوالي په تازه پېښه کې د چارواکو په وینا ۱۴ ملکي وګړي ووژل شول او درې نور ټپیان شول.
که څه هم د دغه ماین چاودنې مسؤلیت کومې وسله والې ډلې نه دی منلی، خو ځايي چارواکي وايي چې ماین طالبانو ځای پر ځای کړی و.
په افغانستان کې د ملګرو ملتونو سیاسي استازوالۍ یا «یوناما» په دایکندي کې دسړک غاړې ماین چاودنې د غندلو ترڅنګ ویلي چې دا د سولې پر لور لار نه ده.
یوناما ټینګار کړی چې د دغو غیر قانوني ځکمنیو ماینونو ښخول باید ودرول شي.
په اعلامیه کې ویل شوي: "ددغو غيرقانوني ځمکنيو ماينونو کارول ودروئ. دا دسولې پرلور لار نده"
د ملګرو ملتونو سیاسي استازوالۍ ویلي چې یوازې تیره میاشت په افغانستان کې د سړک غاړې ماین چاودنو له امله ۱۰۰ ملکيان وژل شوي دي.
دا په داسې حال کې ده چې د تیرې سپټمبر میاشتې پر ۱۲مه نېټه په قطر کې د افغان سولې په اړه بین الافغاني مذاکرات پرانیستل شول، خو تر اوسه د مذاکراتو پر عمومي اجنډا نه دي سلا شوي.
که څه هم تمه ښودل کېدل چې د مذاکراتو په پیلېدو سره به په افغانستان کې تاوتریخوالی کم شي، خو چارواکي وايي چې د تمې خلاف تاوتریخوالی زیات شوی دی.