د غزني پوهنتون د دري ادبیاتو پوهنځۍ یو ټولګي کې د چاودنې له امله ۲۷ تنه محصلین ټپيان شوي دي.
دغه چاودنه نن سې شنبه د اکتوبر پر ۸مه «تلې۱۶مه»سهار لس بجې په یاد ټولګي کې د درس ویلو پر مهال رامنځته شوې ده.
د افغانستان د کورنیو چارو وزارت ویاند نصرت رحیمي ویلي، چې په دغه چاودنه کې ۲۷ تنه محصلین ټپيان شوي دی.
که څه هم د کورنیو چارو وزارت ویاند نصرت رحیمي ویلي، چې دغه ماین د طالبانو لخوا ځای پر ځای شوی و، خو طالبانو په دغه چاودنه کې خپل لاس لرل رد کړي دي. بلې ډلې هم تر دا مهاله مسؤلیت نه دی منلی.
بلخوا د غزني د روغتون یوه مسؤل ډاکټر عبدالبصیر رامکي امریکا غږ ته وویل، چې د پېښې له ځایه دوی ته ۲۵ټپيان وروړل شوي دي، چې ۱۸ نجونې او پاتې نارینه محصلین پکې شامل دي.
د دغه ولایت روغتیايي چارواکو د درې ټپیانو روغتیايي حالت د اندېښنې وړ بللی دی.
د غزني چارواکو ویلي، چې په دغه چاودنه کې د پوهنتون کوم محصل نه دی وژل شوی.