اسټرالیا په رسمي توګه د خپلو بحري ځواکونو اوبتلونه په اتومي وسلو د سمبالولو لپاره د بریتانیا او متحده ایالاتو سره نوی دفاعي تړون لاسلیک کړ.
د اسټرالیا د دفاع وزیر پیټر ډټن د امریکا او بریتانیا د دیپلوماتانو سره د لاسلیک په مراسمو کې برخه واخیسته. په تړون کې به د درې واړو هیوادونو تر منځ په اتومي وسلو د سمبالو اوبتلونو د ځواک په هکله حساس معلومات شریک کیږي.
دا د دوی تر منځ په اتومي وسلو د سمبالو اوبتلونو په هکله لومړنی تړون دی چې په عامه توګه لاسلیک کیږي. دغو دریو واړو هیوادونو د همدې روان کال د سپټمبر په میاشت کې د دفاعي همکارۍ ائتلاف د جوړولو خبر ورکړی و چې هدف یې په آرام سمندر کې د ستراتیژیکو ستونزو سره مبارزه وي.
په همدې سیمه کې د چین او متحده ایالاتو سیالي هم مخ په زیاتیدو ده.
د تړون د لاسلیک نه وړاندې د متحده ایالاتو جمهور رئیس جو بایډن د جمعې په ورځ په یوې اعلامیې کې ویلي و چې "دا تړون به همکارۍ ته اجازه ورکړي او پدې سره به زمونږ دوه اړخیز دفاعي وضعیت بهتر شي".
د امریکا،بریتانیا او اسټرالیا تر منځ د (AUKUS) ائتلاف له مخې اسټرالیا ته ۸ په اتومي وسلو سمبال او پرمختللي اوبتلونه ورکول کیږي چې د اوږد واټن پټ ماموریت اجرا کولو وړتیا لري. د همدې تړون له مخې درې واړه هیوادونه د سایبري، مصنوعي استخباراتو، کوانټوم او د سمندر لاندې د نامعلومو وړتیاو په هکله معلومات شریک کوي.
چین پدې تړون اختلاف څرګند کړی او هغه یې "بې حده غیر مسؤلانه" او د سیمې ثبات ته خطر بللی.
دې تړون یوازې چین نه بلکې د ناټو غړی هیواد فرانسه هم خفه کړې. فرانسه ځکه په غصه ده چې د اسټرالیا سره په ډیزلو چلیدونکو اوبتلونو قرارداد چې اټکلي ارزښت یې ۶۵ میلیارده امریکایي ډالره کیده، فسخ شو.
خو د اسټرالیا صدراعظم سکاټ موریسن د تړون د تنظیم کولو په برخه کې د انتقادونو پروا نده کړې. ښاغلی سکاټ پدې ټینګار کوي چې دا تړون یې د هیواد د ملي ګټو په خاطر کړی.