ټاکل شوې چې د ۲۰۲۳ کرکټ نړیوال جام په پای لوبې کې هند د اسټرالیا سره یکشنبه نومبر ۱۹ (لړم۲۸) د احمد آباد په لوبغالي کې مخامخ شي.
اسټرالیا پنځه او هند دوه ځلې د دې جام اتلولي ګټلې ده.
د هند د کرکټ ملي لوبډلې کپتان روحیت شرما چې لوبډلې یې په روانو سیالیو کې لس لوبې په پرله پسې توګه ګټلي، وایي چې د پای لوبې لپاره لوبغاړي چمتو دي.
ښاغلي شرما په خبري کنفرانس کې وویل چې د هرې لوبې وړاندې لوبغاړي آرام او چمتو وي او په پای لوبې کې هم په همدې مورال لوبغالي ته ورځي.
هغه زیاته کړه، " پوهیږو چې بیرون چاپیریال څه ډول دی. هیلې، فشار، انتقاد او نور څه. نو مهمه ده چې خپلو وړتیاوو ته دوام ورکړو او دا هغه څه دي چې د ټیم په توګه به یې وکړو".
اټکل شوی چې د هند – اسټرالیا تر منځ د پای لوبې کتلو لپاره به ۱۳۰ زره کسان د احمدآباد لوبغالي ته ورشي.
د اسټرالیا د لوبډلې کپتان پاټ کمینز هم وویل چې په لوبغالي کې د دومره ډیرو کسانو شتون یوه ستونزه ده.
ښاغلي کمینز په خبري کنفرانس کې وویل چې په لوبغالي کې به ډیری تماشه چیان د هند پلوي کوي خو تر څنګ یې دا هم وویل چې تر ټولو ډیره خوښي په همدې کې ده چې د خلکو دومره ډیر شمیر خلک یو دم غلي شي.
هغه زیاته کړه، " باید د پای لوبې هره برخه درک کړو. هلته به شور او د خلکو لیوالتیا ډیره وي خو باید پرې نښودل شي چې دا ډول حالت په تاسو اغیز وکړي".
هند د لومړي ځل لپاره د پنځوس اوریزه نړیوال جام اتلولي په ۱۹۸۳ کې ګټلې وه او په ۲۰۱۱ کال کې یې هم دا جام ګټلی و چې کوربه یې پخپله هند و.
خو په ۲۰۱۵ کال کې یې د دې جام په نیمه پای لوبې کې د اسټرالیا او په ۲۰۱۹ کې د نیوزلینډ په مقابل کې ماتې وخوړله.
همدارنګه دا اتم ځل دی چې د اسټرالیا د کرکټ ملي لوبډله د نړیوال جام نیمه پای لوبې ته اوځي او پنځه ځله یې اتلولي هم ګټلې ده.