د افغانستان مشهور غر ختوونکی علي اکبر سخي په پاکستان کې د نړۍ دوهمې لویې څوکې (K2) ته د ختلو پر مهال مړ شوی دی.
د پاکستان ډان ورځپاڼې او د علي اکبر سخي نژدې دوست خیبر خان د هغه مړینه تائید کړئ ده.
ډان ورځپاڼې د جمعې په ورځ جولای ۲۲ (چنګاښ ۳۱) د خپلو سرچینو له قوله ویلي چې یاد افغان غر ختوونکی پرون پنجشنبه په پاکستان کې د نړۍ په کچه د غره لوړې څوکې ته د ختلو پر مهال د زړه درېدو له امله ساه ورکړې ده.
د هغه نژدې دوست خیبر خان هم پر خپل ټویټر پاڼه لیکلي چې علي اکبر سخي غوښتل چې د افغان غر ختوونکو په استازولۍ د ( K2) څوکې ته پورته شي چې تیره ورځ یادې څوکې ته نژدې مړ شوی دی.
Devastated to share that #Afg Mountaineer & close friend @SakhiAliakbar passed away on his K2 mission near the summit of K2 mountain.His life goal was to inspire Afg youth & represent #Afg in mountaineering. We lost an inspirational athlete, brother, friend, father & husband 💔😢 pic.twitter.com/bXs1Art2ua
— Khyber Khan (@khyberkhaan) July 21, 2022
نوموړي زیاته کړې چې د علي اکبر سخي هدف غر ختلو ته د افغانانو هڅول او د هغوی استازیتوب و.
هغه په افغانستان کې د (هایک او وینچر) غر ختوونکي ټېم مشري هم کوله. د علي اکبر سخي په مشرۍ د افغان غر ختونکې ډله په ۲۰۲۰ کال کې د افغانستان تر ټولو لوړې څوکې «نوشاخ» ته پورته شوي وه.