د ناټو سرمنشي ینزستولتنبرګ وايي چې د افغانستان حکومت باید ژر تر ژره د سولې په روانو مذاکراتو کې دخیل کړل شي.
ښاغلي ستولتنبرګ په بروګسل کې د پنجشنبې په ورځ (فبروري۱۴) په یو خبري کنفرانس کې د سولې په روانو مذاکراتو کې د افغان حکومت د اساسي او مهم رول غوښتنه وکړه.
له وسله والو طالبانو سره د امریکایي استازو مخامخ خبرې له څه مودې راهېسې پیل شوي دي او په دغو خبرو کې د پرمختګ راپورونه هم ورکړل شوي دي.
ټاکل شوې ده چې د همدغې میاشتې په ۱۸ نیټه په اسلام اباد کې طالب استازي له امریکایي استازو او د پاکستان له لومړي وزیر صدراعظم سره هم وویني.
ښاغلي ستوتنبرګ وویل د سولې د روانو مذاکراتو د پایلو په اړه وړاندوینه ناممکنه ده خو وايي له طالبانو سره د امریکا د خبرو هدف بین الافغاني مذاکراتو ته لار پرانیستل دي.
د ناټو سرمنشي ټېنګار وکړ چې په روانو مذاکراتو کې د افغان حکومت له اساسي رول پرته په افغانستان کې دومداره سولې ته رسېدل ناممکن ښکاري.
Your browser doesn’t support HTML5
د ناټو سازمان غونډه
ټاکل شوې د ( فبرورۍ په ۱۵ او ۱۶) نیټه د جرمني په مونشن کې د نړۍ د مشرانو په ګډون کلنۍ امنیتي غونډه وشي.
افغان ولسمشر محمد اشرف غني او د نړۍ نور مشران دغې غونډې کې د ګډون لپاره مونشن ته تللي دي.
د مونشن غونډې ترڅنګ ټاکل شوې چې ولسمشر غني د یوه آزاد بحث مشري هم وکړي په دغه بحث کې به د پاکستان د بهرنیو چارو وزیر شاه محمود قریشي هم ګډون وکړي.
د معلوماتو پر اساس ولسمشر غني به په افغانستان کې د روانو حالاتو او د سولې د خبرو په هکله ګډون والو ته معلومات ورکړي.