تورخم د افغانستان او پاکستان تر منځ د سوداګرۍ مهم بندر دی. یو وخت د کابل او اسلام آباد ۶۰٪ تجارت یواځې له همدې لارې کیده، خو د سوداګرۍ دا بهیر اوس ډیر بې خونده روان دی.
د دواړو هېوادونو تر منځ ترینګلې اړیکې، بې باورۍ او له نورو ګاوندیو هېوادونو سره د افغانستان تجارتي کاروبار له پاکستانه د افغان سوداګرو د مخ اړولو مهم لاملونه ګڼل کیږي.
ځېنو اندېښنه ښودلې چې د ایران د چابهار بندر له لارې د افغانستان او هند تر منځ سوداګري به د افغانستان او پاکستان ټرانزیټ نور هم اغیزمن کړي.
د افغانستان د سوداګرۍ خونې ویاند صیام الدین پسرلی وايې چې په ۲۰۱۷ کال کې له پاکستان سره د سوداګرۍ اندازه ۷۰۰ میلیونه ډالر راټیټه شوې ده.
د ننګرهار د ګمرک مامورین د تورخم له لارې د سوداګرۍ پر مسلې نه غږېږي، خو د ننګرهار د والي ویاند عطاالله خوږیانی وایې چې له پاکستان سره "سوداګري کمه شوې ده، خو منفي تاثیر یې نه دی کړی."
همدارنګه، پر تورخم دروازې د خلکو تګ راتګ هم د پام وړ کم شوی دی. د شمېرو له مخې پخوا به هره ورځ لدې لارې زرګونو کسانو تګ راتګ کاوه خو اوس دا شمېر سلګونو کسانو ته راښکته شوی دی.
د پاکستان حکومت تازه افغان کډوالو ته یوه میاشت وخت ورکړی چې لدې هېواد څخه ووځي. په اسلام آباد کې د افغانستان سفارت دا ضرب الاجل "غیر عملي" بولي.
Your browser doesn’t support HTML5
د افغانستان او پاکستان تر منځ سیاسي او تجارتي اړیکې