د افغانستان ولسمشرۍ ماڼۍ د قطر حکومت د دوحې د «بین الافغاني» کنفرانس د لغوه کېدو په اړه ملامت یا مقصر وباله.
ټاکل شوې وه دغه کنفرانس د روانې اپرېل میاشتې له ۱۹ مې څخه بیا تر ۲۱ نېټې پورې د دغه هېواد په مرکز دوحه کې تر سره شوی وای.
ولسمشرۍ ماڼۍ پرون ناوخته په یوې اعلامیې کې ویلي، په داسې حال کې چې قطر ته د ۲۵۰ کسیز افغان پلاوي د تګ ټول چمتووالی نیول شوی و، خو د قطر حکومت د دغه کنفرانس د ګډونوالو یو «نوی لېست» افغان حکومت ته لېږلی دی.
افغانستان، د قطر حکومت لخوا د یاد لېست لېږل"د افغانستان د خلکو ارادې او فیصلې ته بې احترامي بللې او زیاتوي چې دغه کار د افغانانو لپاره د «منلو وړ» نه دی."
ولسمشر غني تېره چهارشنبه د دوحې کنفرانس ګډونوالو ته د وینا پرمهال
د ارګ د اعلامیې لهمخې پرون ناوخته ولسمشر غني په دې اړه له یو شمېر سیاسي مشرانو سره غونډه کې فیصله کړې چې د قطر حکومت یاده پرېکړه د افغان حکومت لپاره د «منلو»نه ده.
افغان حکومت له قطر هېواد څخه غوښتي چې په دغه کنفرانس کې د افغان حکومت لخوا ټاکل شوی پلاوی ګډون وکړي.
د ولسمشرۍ ماڼۍ په اعلامیه کې راغلي:"داچې د قطر حکومت پدې ونه توانیده چې زموږ دا برحقه غوښتنه عملي کړي نو د قطر حکومت د دوحې کنفرانس لغوه کړ."
د طالبانو غبرګون
طالبانو بیا ویلي، چې د کنفرانس د لغوه کېدو یو علت د افغان حکومت لخوا دغه کنفرانس ته په یو اړخیز ډول د ګدون کوونکو د نومونو ترتیب شوی لېست و چې دغه ډلې ته د منلو نه و.
دغه ډلې ویلي، افغان حکومت هڅه وکړه چې دغه بین الافغاني کنفرانس ته د افغان حکومت او طالبانو ترمنځ د کنفرانس بڼه ورکړي.
د طالبانو په اعلامیه کې ویل شوي:"دا پخپله په واضح ډول د یاد کنفرانس د ځنډېډو او د سولې ضد هڅه وه."
د افغان حکومت د اعلامیې تر خپرېدو وروسته د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد هم پر خپل ټوېټر ولیکل چې د دوحې «بین الافغاني» ناسته ځنډېدلې ده.
ښاغلي خلیلزاد د یادې غونډې پر ځنډېدو «ناهیلي» ښودلې، خو د دې ترڅنګ یې پر ټولو ښکېلو اړخونو غږ کړی چې له دې شېبې ګټه واخلي.
۱/۴ په ډیر تاسف سره چې د سولې بین الافغاني کنفرانس چې د د دوحې د شخړو او بشري مرستو د مرکز لخوا د اپریل په ۲۰ او ۲۱ نیټه ترسره کیدو، ځنډیلی دی. له بده مرغه لا هم د ګډونوالو پرسر د اجماع جوړولو اړتیا شته. #دافغاني_سولې_پروسه
— Sultan Barakat (@BARAKAT_Sultan) April 18, 2019
نوموړي ویلي"خبرې اترې به تل د یوې سیاسي لارې د نقشې او تلپاتې سولې کیلي وي او زیاته کړې ده چې له خبرو پرته بل هېڅ لاره نشته.
نوموړي له ټولو ښکېلو اړخونو غوښتي چې د داسې یو پلاوي پر لېست دي توافق ته ورسیږي چې د ټولو افغانانو استازیتوب وکړي،خو زیاته کړې ده "که اړتیا پیداشي زه به د دغه لېست په چمتوو کولو کې مرسته وکړم."
پر همدې مهال په قطر کې د شخړې او بشري څېړنو د مرکز مشر سلطان برکات چې د دغه کنفرانس تنظیمونکی دی هم پر ټویټر لیکلي چې د سولې لپاره دغه بین الافغاني کنفرانس ځنډېدلی دی.
۱/۴ با تأسف فراوان که کنفرانس صلح بین الافغاني که از جانب مرکز مطالعات نزاعات و مطالعات بشری قرار بود به تاریخ ۲۰ و ۲۱ اپریل برگزار گردد به تأخیر افتاد. جای تأسف است که هنوزهم نیاز است تا درمورد اشتراک کنندگان کنفرانس به اجماع رسید. #پروسه_صلح_افغانی
— Sultan Barakat (@BARAKAT_Sultan) April 18, 2019
ښاغلي برکات ويلي، چې د غونډې د اجنډا پرسر د هیڅ لوري اختلاف نشته، خو د ګډونوالو د لېست پرسر لا هم هوکړه نه ده شوې.
دا په داسې حال کې ده چې وسله والو طالبانو د تېرې چهارشنبې په ورځ د افغان حکومت لخوا د اعلان شوي ۲۵۰ کسیز نوملړ د شمېر پر زیاتوالې باندې اعتراض وکړ.
طالبانو په یوه بیان کې ویلي چې د کنفرانس تنظیمونکي د دومره ډېرو کسانو د بلنې پلان نه لري، بلکې د یاد لېست څو محدود شمېر کسان به دغه کنفرانس ته وبلل شي.