د پروان امنیتي چارواکي وايي، افغان ځواکونو نن چهارشنبه سهار جون ۳۰ (چنګاښ نهمه) د دغه ولایت د شینوارو ولسوالي بیرته له طالبانو څخه ونیوله.
د دغه ولایت امنیه قوماندان عبدالروف ارزګاني امریکا غږ ته وویل چې په پروان کې مېشتو افغان ځواکونو له تیرې ورځې د شینوارو او سیاه ګرد ولسوالیو د بیرته نیولو عملیات پيل کړي وو.
نوموړي زیاته کړه: "نن سهار څلور بجې زموږ سرتیري وتوانېدل چې شینوارو ولسوالي بیرته ونیسي، موږ فعلاً په ولسوالیو کې یو، وسله والو مخالفینو ته درنه مرګ ژوبله اوښتې ده."
د پروان امنیه قوماندان وویل چې د دغه ولایت د سیاه ګرد ولسوالۍ د بیرته نیولو عملیات هم روان دي او په وینا یې په دغه عملیاتو کې ۶۸ وسله وال طالبان وژل شوي او نهه تنه نور ټپيان شوي دي.
د افغانستان دفاع وزارت هم له طالبانو څخه د شینوارو ولسوالۍ بیرته نیول کېدل تائید کړي.
وسله والو طالبانو پنځه ورځې مخکې د پروان ولایت د شینوارو او سیاه ګرد ولسوالۍ ونیولې.
طالبانو تر دا مهاله په دې اړه څه نه دي ویلي.