اسلام اباد کې یوه لس کلنه ماشومه فرښته مومند د جنسي تیرې نه وروسته قتل شویده او د هغې د بدن غړي پرې کړل شویدي
د فرښته مومند پلار پاکستاني رسنیو ته ویلي دي چې لور یې په ١٥ می د کوره لادرکه شوي وه او هغوي یې پولیس ته خبر ورکړ خو پولیسو د هغه د لور د لادرکۍ رپورټ ثبت نه کړ، څو ورځې وروسته د هغې مړې په داسې حالت کې وموندل شو چې په دغه ماشومې جنسي تیرې شوی و او د بدن غړي یې پری کړل شوي و.
د پاکستاني پولیسو د دغه چلند ضد او د عدالت لپاره د فرښتې کورنۍ احتجاج پیل کړ چې هغه وخت ورته د رسنیو پام شو چې کله د پښتون تحفظ تحریک مشرانو په دغه احتجاج کې گډون وکړ.
د بشري حقونو فعالانو د دغه پیښې خلاف په ټولنیزو رسنیو هم خپل احتجاج وښود.
محسن داوړ هم د فرښتې او د هغې د کورنۍ لپاره د عدالت غوښتنې په خاطر په دغه احتجاج کې گډون کړی و.
داوړ امریکاغږ ته وویل: "د فرښتې پلار یو غریب سړی دی، څو ځله پولیسو ته وراغې خو پولیسو به پرې خپل کارونه کول او ورته یې ویل چې لور به دي د چا سره تښتیدلي وي. هغه ورته وویل چې فرښتنه یوه لس کلنه ماشومه ده، هغه به څنگه د چا سره تښتیدلې وي؟"
محسن داوړ وایي چې د فرښتې کورنۍ ته عدالت غواړي.
د پښتون تحفظ مشرانو د فرښتې په جنازې کې گډون وکړ
له بلې خو د پاکستان د ډان ورځپاڼې په یو تازه رپورټ کې لیکي دي چې د فرښتې د قتل په شک یې دوه کسان نیولي دي.
داوړ دا هم وویل چې د هغوي د احتجاجونه نه وروسته د حکومتي گوند څو استاځي د فرښتې د پلار خوا له راغلي دي او ورته یې ډاډ ورکړیدی چې تحقیقات به وشي.