د ملګرو ملتونو د وګړو صندوق یا (UNFPA) یو ځل بیا په افغانستان کې د بشري بحران زیاتېدو په اړه د اندېښنې په ښودلو سره ویلي چې په دغه هیواد کې په هرو دوو ساعتونو کې یوه مور د زېږون پر مهال خپل ژوند د لاسه ورکوي.
یاد صندوق نن چهارشنبه مارچ ۱۶(کب ۲۵) پر خپل ټویټر پاڼه لیکلي چې د دې ترڅنګ په دغه هیواد کې په هرو دوو ښځو کې یوه له جنسیتي تاوتریخوالي سره مخ ده.
یاد بنسټ د اندېښنې په ښودلو سره ویلي چې افغانستان کې روان بحران ته په کتو د ښځو وضعیت نور خرابېدایشي.
د ملګرو ملتونو د وګړو صندوق زیاته کړې چې دوی په افغانستان کې ۹.۲۸ میلیون وګړو ته د بشري مرستو رسول په پلان کې لري.
دغه سازمان ویلي چې افغانستان د نظام تر بدلون وروسته له بېساري بشري ناورین سره مخ دی او په خبره یې سیاسي بدلون، وچکالۍ او کرونا ویروس په دغه هیواد کې د تیرو ۲۰ کلونو لاسته راوړنې له ګواښ سره مخ کړي دي.
په ۲۰۲۲ میلادي کال د افغانستان لپاره بشردوستانه پلان
ملګرو ملتونو تر دې مخکې په افغانستان کې اړمنو کسانو ته د رسېدو په هدف د ۴.۴ میلیارد ډالرو غوښتنه کړې وه.
د دغه سازمان د وګړو صندوق ویلي چې دوی هم په افغانستان کې دخپلو بشري فعالیتونو لپاره ۱۵۱.۹ میلیون ډالرو ته اړتیا لري تر څو د میندو د زېږون په مهال د هغوی روغتیا او ساتنې ته ځواب ووايي.
خو دغه سازمان ویلي چې په افغانستان کې د بشري بحران له امله ۹/.۳ میلیون اغېزمن شوي دي.
دا په داسې حال کیده چې د ملګرو ملتونو د وګړو صندوق یا (UNFPA) روانه میاشت هم په افغانستان کې د زېږون پر مهال د میندو د مړینې د کچې زیاتوالې په اړه اندېښنه ښودلې وه او ویلي و چې د اسیا په کچه په دغه هیواد کې د اومیدواره مېرمنو د مړینې کچه زیاته ده.
دغه صندوق ویلي و چې په افغانستان کې د زېږون په مهال په هرو ۱۰۰زرو میندوکې ۶۳۸ یې مري.
ملګرو ملتونو خبرداری ورکړی دی که چیري په دې برخه کې جدي توجه ونشي، په دغه هیواد کې به د زېږون پرمهال د میندو د مړینې کچه نوره هم زیاته شي.
په وروستیو کلونو کې د زېږون پرمهال د میندو د مړینه کچه په بېساري توګه ټيټه شوې وه. د راپورونو په اساس په ۱۳۹۸ کال کې د ۱۰۰زره زېږون څخه ۳۹۶ میندو خپل ژوند له لاسه ورکړی و.