په جنوبي عراق کې چارواکي وايي چې وسله والو چې ځانمرګه واسکټونه یې اغوستي وو د پولیسو پر یوې امنیتي پوستې یې برید وکړ لږ تر لږه اووه کسان یې ووژل.
چارواکي وايي چې په برید کې چې د قادسیې په ښارګوټي کې شوی دی، ۱۵ تنه نور ټپیان شوي هم دي. برید د بغداد په ۱۸۰ کیلومیټرۍ کې جنوب لورې ته شوی دی.
امنیتي چارواکي وايي چې برید د اسلامي دولت ډلې کړی دی او ټول برید کونکي وژل شوي دي.
د عراق د کورنیو چارو د وزارت ویاند سعد مان وايي چې بریدکونکو هڅه کوله چې ځانونه د نجف ښار ته ورسوي او هلته چاودنې وکړي. نجف د عراق د شعیه ګانو مذهبي مرکز ګڼل کیږي.
د عراق په جنوب کې بریدونه ډیر کم کیږي ځکه په دغه سیمه کې اکثریت شعیه ګان اوسیږي. داعش د عراق په جنوب کې نشته خو کله نا کله په دې سیمې باندې بریدونه کوي.